ABŞ–İran gərginliyində təhdidlər və qarşılıqlı sərt bəyanatlar davam edərkən, İran tərəfindən gözlənilməz bir açıqlama gəlib. İran rəsmiləri zənginləşdirilmiş uranı Rusiyaya verməyə razı ola biləcəklərini bildiriblər.

ABŞ–İran gərginliyində yeni inkişaf yaşanıb. Xalqcebhesi.az xəbər verir ki, ABŞ mətbuatında yer alan məlumata görə, İran zənginləşdirilmiş uranını Rusiyaya verməyə razı ola biləcəyinə dair siqnal verib. Rəsmilər bu mesajı Rusiya Prezidenti Vladimir Putinə çatdırdıqlarını açıqlayıblar.

Məlumata görə, iranlı rəsmilər belə deyiblər:
“Biz nüvə proqramımızı dayandırmağa və ya müvəqqəti olaraq dayandırmağa hazırıq. Zənginləşdirilmiş uranımızı Rusiyaya verməyə razı ola bilərik. Bu mesajı Putinə gedərək çatdırdıq.”

Kremlin sözçüsü Dmitri Peskov isə açıqlamasında Rusiyanın İran ətrafındakı gərginliyin azaldılmasına töhfə verməyə hazır olduğunu bir daha vurğulayıb.

Peskov bildirib ki, bu çərçivədə Rusiyanın daha əvvəl də gündəmə gətirdiyi – İranda zənginləşdirilmiş uranın Rusiyaya gətirilərək mülki nüvə reaktorları üçün yanacağa çevrilməsi təklifi hələ də qüvvədədir. Onun sözlərinə görə, sözügedən təklif nüvə gərginliyinin azaldılmasına yönəlmiş mümkün variantlardan biri kimi dəyərləndirilir və Rusiya diplomatik səylərini davam etdirir.

Məryəm Quliyeva