Separatçılar Ukrayna ordusunun mövqelərini yenidən raket atəşinə tutub

Cavid

Ukrayna dövləti və separatçilar arasında sentyabrın 5-də atəşkəs elan olunsa da sərhəd bölgələrdə atışma səsələri yenidən eşidilməyə başlayıb. Atəşkəs imzalandığı gündən isə Ukrayna Silahlı Qüvvələri 200-ə yaxın hücumu dəf edib. Bu açıqlama Ukrayna Milli Təhlükəsizlik və Müdafiə Şurasından verilib.
Donetskdə də atəşkəsin 10-cu günü gərginlik artıb. Şəhər rus separatçıların yaylım atəşinə məruz qalıb, dinc sakinlər arasında ölən var. Bu barədə şəhər şurasının saytı xəbər yayıb.
Məlumata görə, bütün günü şəhərdən atəş səsləri eşidilib. Xüsusilə də şəhərin Kuybışev və Kiyev rayonları atəşə tutulub.
"Yaşayış binaları, infrastrukturda dağıntılar, dinc sakinlər arasında ölənlər və xəsarət alanlar var. Dəqiq informasiya daha sonra veriləcək", şəhər şurası bildirir.
Sosial şəbəkə istifadəçiləri də atışmalar barədə yazırlar.
Ukrayna sosial şəbəkə istifadəçiləri isə İçkeriya-Çeçenistan Respublikasının mərhum prezidenti Cövhər Dudayevin adını daşıyan batalyon üzvlərinin artıq Ukrayna ərazisinə gəldiklərini təsdiqləyən şəkilləri paylaşıb.
Qeyd edək ki, aralarında batalyon komandiri İsa Munayevin də olduğu dəstənin ruslara qarşı savaşa hazırlaşdıqları qeyd olunub. Munayevdən fərqli olaraq digər döyüşçülərin üzləri göstərilməyib. Bəzi mütəxəssislər, o cümlədən də bir neçə gün öncə müsahibə verən və bu məqama xüsusi toxunan çeçen hüquq müdafiəçisi Mayrbek Taramov bidirib ki, mühacirət həyatı yaşayan soydaşlarının kameralar qarşısında görünmək istəməməsi onların Çeçenistandakı yaxınlarına işgəncə verilə biləcəyindən ehtiyatlanmalarıdır.
Bu arada bəlli olub ki, Ukraynada hərbi əməliyyatlarda öldürülən Rusiya hərbçilərinin sayı 3500-ə çatıb. Bu barədə isə ölən rusların axtarışı ilə məşğul olan rusiyalı hüquq müdafiəçisi Yelena Vasilyeva özünün Feysbuk səhifəsində yazıb: "300 nəfər Pobeda yaxınlığında öldürülüb, 47 nəfər İlovayskdan geri çəkiləndə öldürülüb, Snejnoyedə 1200 döyüşçüdən 120-si (470 nəfər yaralı), Pskov desantlarından 70 nəfər (cəmi 10 nəfər sağ qalıb), 230 nəfər artilleriya atəşi zamanı öldürülüb, Qafqaz batalyonundan 60 nəfər, Novoazovsk yaxınlığında 59 meyit, təxminən 40 meyiti də şaxtaya atıblar. Cəmi 926 nəfər. Bu, yalnız müxtəlif mənbələrdən dəqiqləşdirilən məlumatlardır. Hələ nə qədər də döyüş meydanından çıxarılmayan yaralılar var. Hə, unutmuşdum, Krasnokamenska şaxtası yaxınlığında 600 meyit atıblar. Sayın!".
Qeyd edək ki, bir müddət əvvəl Rusiyada "Əsgər anaları" təşkilatının apardığı hesablamalara görə, Ukraynada 2 minə yaxın rus əsgərinin öldürüldüyü bildirilmişdi.
BMT-nin hesablamalarına görə isə Ukraynanın şərqində aprelin ortalarından davam edən silahlı münaqişə 3000-dən çox adamın həyatına son qoyub.
Ukrayna ordusu ilə Rusiyayönümlü qüvvələr arasında girovların mübadiləsi dünən də davam edib. Ötən gün Donetsk yaxınlığında ölkənin şərqində gedən döyüşlərdə hər iki tərəfdən girov götürülmüş daha 73 nəfərin mübadiləsi baş tutub.
"Biz mühasirəyə alınmışdıq. Təslim olmaq məcburiyyətində qaldıq. Bizə dedilər ki, təslim olun, yoxsa yarım saat ərzində burada hər şeyi məhv edərik. Biz də təslim olmağa məcbur olduq" - hökumətə təhvil verilən ukraynalı əsgərlərdən biri belə deyib.
Mübadilə prosesində ATƏT müşahidəçiləri də iştirak edib. Bir neçə gün əvvəl də ATƏT nümayəndələrinin iştirakı ilə 31 nəfər girov və məhbusun mübadiləsi baş tutmuşdu. Mübadilə sentyabrın 5-də qüvvəyə minmiş atəşkəs çərçivəsində həyata keçirilir.
Rusiya ilə Ukrayna arasında növbəti humanitar yardım böhranı da yaşanıb. Belə ki, ötən gün Rusiyadan Ukraynanın şərqinə humanitar yardım aparan yük maşını karvanı Ukraynanın Luqansk vilayəti ərazisinə daxil olub və rəsmi Kiyev bu addımı pisləyib. ATƏT-də Rusiyadan gələn humanitar yardım karvan heç bir yoxlamadan keçmədiyini təsdiqləyib. Bildirilir ki, Rusiyaya məxsus yük maşınları Ukrayna sərhədində gömrük yoxlamasından keçməyib və yardımın nədən ibarət olduğundan xəbərsizdir.
Məlumata görə, 193-ü yük maşını olmaqla, 220 nəqliyyat vasitəsindən ibarət olan karvan Ukraynaya "Donetsk" nəzarət-buraxılış məntəqəsindən keçib. Rusiya gömrük xidmətinin yalnız 40 yük maşınını yoxladığı bildirilir.
Ukrayna gömrüyü və Beynəlxalq Qırmızı Xaç Komitəsi isə maşınlardan birinə də baxmayıb. Rəsmi Moskva yük karvanında yalnız ərzaq mallarının olduğunu iddia edir. Humanitar yardımı aparan yük maşınlarının böyük hissəsi artıq Rusiyaya geri dönüb.
Ukrayna prezidenti Petro Poroşenko isə NATO-nun artıq ölkəsinə hərbi yardım göstərməyə başladığını bildirib. Məlumat üçün qeyd edək ki, NATO-nun Ukraynaya dəstəyi gözlənilsə də, bəzi siyasi ekspertlər bu dəstəyin formal xarakter daşıyacağını və proseslərə ciddi təsir göstərməyəcəyi qənaətində idi. Lakin bugünlərdə alman tanklarının Ukrayna ərazisinə daxil olması ilə bağlı yayılan informasiyalar NATO-nun Rusiya təlükəsinə qarşı tədbirlər görmək məcburiyyətində qaldığını göstərir.
Politoloq İlqar Altayın fikrincə, artıq bundan sonra Ukrayna ilə bağlı məqsədlərini reallaşdırmaq Rusiya üçün ikiqat çətin olacaq. Politoloqun fikrincə, Rusiyanın işğalı üçün ən əlverişli zaman Maydan inqilabından sonrakı dövr idi, hansı ki, həmin vaxt Ukraynanın toparlanması müəyyən zaman və güc tələb edirdi. Bu gün isə artıq o imkan itirilib: "Rusiya-Ukrayna hərbi münaqişəsinin sonu görünmür. Fəqət bu da sirr deyil ki, indiki münaqişədə zaman Ukraynan xeyrinə, Rusiyanın əleyhinə işləyir. Putin Maydan inqilabından sonrakı Ukraynanı hakimiyyətsiz, ordusuz, iqtisadiyyatı dağılmış qonşu ölkə kimi yaxalamışdı. Və nə edəcəkdisə, ona həmin ilk dövrdə edə bilərdi. Krımı rahatlıqla ələ keçirdi. Şərqi Ukraynanın ələ keçirilməsində bir qədər gecikdi və artıq müqavimətlə üzləşdi. Odessa və Xarkovda istəyini ümumiyyətlə həyata keçirə bilmədi. Kiyevi və bütün Ukraynanı zəbt etmək isə, "velikorus" ambisiyaçılarının ürəyində bir arzu kimi qaldı".
İ.Altayın fikrincə, Ukrayna qısa müddət ərzində özündə güc taparaq topralanmağa başladı ki, bu məsələdə Qərbin dəstəyi heç də az rol oynamadı: "Ancaq zaman keçdikcə Yanukoviçdən və Moskva kəndirindən xilas olmuş Ukrayna dirçəlib ayağa durmağa başladı. Moskvanın hərbi və başqa təxribat təzyiqlərinə baxmayaraq, Ukrayna xalqı öz legitim prezidentini seçdi, ölkə dövlət strukturlarını, iqtisadi bazasını, beynəlxalq əlaqələrini, ordusunu qurmağa başladı. Təbii ki, bunlar Qərbin və bütün sivil dünya ictimaiyyətinin güclü dəstək və köməyi hesabına baş verir".
Politoloqun bildirdiyinə görə, Ukrayna və Rusiya ordusu arasında kütləvi qırğın silahlarının istifadə edilmədiyi savaş əslində Qərb strateqlərinə də sərf edir: "ABŞ, NATO, Avropa Birliyi beynəlxalq hüquq normaları əsasında Ukrayna ilə hərbi yardıma əsas verəcək lazımı rəsmi razılaşmalar bağlayıblar. Bu əsasda ABŞ instruktorları, Almaniya tankları, müxtəlif müasir silahlar Ukraynaya yeridilir, birgə təlimlər keçirilir. Tədricən Ukrayna ordusu Rusiyanın işğal təzyiqinə davam gətirəcək vəziyyətə gətirilir. Artıq Ukraynanın şərq hissəsi, Donbass hövzəsi müasir silahlı və döyüş təcrübəsi keçmiş hazırlıqlı Ukrayna ordusu ilə Rusiya ordusu arasında döyüş poliqonuna çevrilməkdədir. Əslinə Qərb strateqlərinə belə bir vəziyyət sərf edir: Rusiya ona lazımı müqavimət göstərə bilən slavyan Ukrayna ordusu ilə onun ərazisində və xüsusən də, atom silahı istifadə edilməyən lokal hərbi münaqişədədir".