Yanğının söndürülməsinə bir təyyarə, iki helikopter cəlb olunub

İsmayıllı rayonunda meşə yanğını başlayıb.
Fövqəladə Hallar Nazirliyinin (FHN) İsmayıllı rayon Dövlət Yanğından Mühafizə Hissəsindən APA-nın yerli bürosuna verilən məlumata görə, ötən gecə saatlarından yüksək dağlıq ərazidə başlayan yanğının söndürülməsi üçün əraziyə nazirliyin iki yanğınsöndürən helikopteri və bir təyyarəsi cəlb olunub.
Hava isti və küləkli olduğu üçün yanğın böyük ərazini əhatə edib. Ekologiya və Təbii Sərvətlər Nazirliyinin mətbuat xidmətindən APA-ya verilən məlumata görə, avqustun 26-da İsmayıllı Meşə Mühafizəsi və Bərpası Müəssisəsinin Talıstan meşəbəyiliyinin 2 saylı dolayının yüksək dağlıq sahəsində yanğın hadisəsi baş verib.
İlkin ehtimala görə yanğın meşədə böyürtkən yığan kənd sakinlərinin odla ehtiyatsızlığı səbəbindən baş verib.
Havaların isti və quraq keçməsi ilə əlaqədar ETSN bir daha əhalini təbiətdə olarkən odla ehtiyatlı olmağa, yanğın təhlükəsizliyi qaydalarına riayət etməyə çağırır.