Sammitdə ölkəmizi Bütöv Azərbaycan Xalq Cəbhəsi Partiyası təmsil edəcək

Aprelin 7-də, Albaniyanın paytaxtı Tirana şəhərində Avropa Mühafizəkarlar və İslahatçılar Alyansının (Alliance of Conservatives and Reformists in Europe -ACRE) təşkilatçılığı ilə Birinci Avropa Azadlıq sammiti keçiriləcək.
Bununla bağlı Alyansın baş katibi Daniel Hannan müraciət yayıb.
Müraciətdə tarixi zirvə toplantısının kommunizmin zərərli mirasına həsr olunduğu bildirilir: "Kommunizm baş tutmamış sayılsa da onun güclü təsiri bu gün də, xüsusilə də bu ideologiyadan daha çox zərər çəkən cəmiyyətlərdə hiss olunmaqdadır. 2017-ci ildə bolşevik inqilabının 100 illiyi qeyd olunacaq. Amma təəssüf ki, marksizm-leninizm adına həyata keçirilən dəhşətli cinayətlər unudulub. Azadlıq sammitində təkcə kommunizmin gətirdiyi fəlakətlər deyil, eyni zamanda onun təhrif etdiyi və bərpası olqca çətin olan vətəndaş cəmiyyətlərinin vəziyyətdən çıxış yolları barədə də müzakirələr aparılacaq".
Qeyd edək ki, sammitdə Azərbaycanı Bütöv Azərbaycan Xalq Cəbhəsi Partiyası təmsil edəcək.
Xatırladaq ki, BAXCP 2015-ci ildən Avropa Mühafizəkarlar və İslahatçılar Alyansının tamhüquqlu üzvüdür.