Rusiya prezidentinin köməkçisi Vladislav Surkov Donbassdakı münaqişə zonasında vəziyyətin gərginləşdirilməsi üçün hazırlıq görür. Virtualaz.org xəbər verir ki, bu haqda Ukraynanın İnformNapalm könüllülər qrupu münaqişə zonasında yer alan rusiyameylli separatçılardan və yaraqlılardan əldə edilmiş məlumatlara, onların telefon danışıqlarına istinadən bildirir.
Məlumata görə Surkovun "Donbass könüllüləri ittifaqı" adlı hərbi şirkəti var və onun sıralarında Suriya və Qarabağdakı münaqişələrdə iştirak etmiş muzdlular yer alır. Bildirilir ki, iyun ayında Surkovun ordusu "Şimal küləyi" adlı əməliyyata başlayacaq və nəticədə regionda vəziyyət yenidən kəskinləşəcək. "Surkovun terrorçularının yazışmalarının analizi göstərir ki, ehtiyatdan yaraqlılar səfərbər olunur, onlar fəal hazırlıq keçir"-informasiya qrupu bildirir.
Vladislav Surkov Ukraynanın şərqində separatizm dalğasını başladan və daha sonra qondarma Donetsk və Luqansk "xalq respublikalarını" kurasiya edən adam kimi tanınır. Onun Donbass separatçılarına verdiyi təlimatlar bir müddət əvvəl hakerlər tərəfindən ələ keçirilmişdi və internetdə yayılmışdı.
Könüllülərin məlumatına görə Surkovun ordusu minə yaxın döyüşçüdən ibarətdir, onlardan çoxu Rusiyanın Suriya və Qarabağdakı hərbi avantüralarında iştirak ediblər. Qrup onların adlarını və digər şəxsi məlumatlarını internetdə yayıb. Belə məlum olur ki, Surkovun Krımdakı döyüş bölməsinə Dmitri Xavçenko ("Moryaçok") adlı şəxs rəhbərlik edir.
Bu ilin yayında Qarabağ münaqişəsi zonasında da vəziyyətin kəskinləşməsi riski var. Qərb ekspertləri, o cümlədən ABŞ Milli Kəşfiyyat Agentliyi bu barədə xəbərdarlıq edib. İrəvandakı strateji araşdırmalar Mərkəzinin rəhbəri Riçard Kirakosyan deyir ki, təmas xəttində yeni toqquşmalar əngəlləyə bilən effektiv mexanizmlər yoxdur. Bu səbəbdən Azərbaycan ordusunun elə bu yay yeni hücumunu gözləmək lazımdır.