“Baş verən daşqınların qarşısını almaq üçün erkən xəbərdarlıq sistemi işlənəcək. Yəni daşqınlar hansı sahələrdə baş verəcək bunu öncədən xəbər vermək mümkün olsun ki, insanlara zərər dəyməsin. Çünki son dövrlərdə yağışların intensiv olması səbəbindən daşqınların sayı həddindən artıq artıb”.

Bu sözləri “Xalq Cəbhəsi”nə açıqlamasında “Sağlam həyata doğru” Ekoloji İctimai Birliyinin sədri Sadiq Həsənov deyib.

S.Həsənovun sözlərinə görə, hətta Göyçay kimi daşqın olmayan ərazilərdə də daşqın baş verir: “Xüsusilə bu, Azərbaycanın şimal-qərb regionlarına aiddir. Qəbələ, Oğuz, Şamaxı, Şəki, Qax rayonlarında həddindən artıq daşqınlar baş verir. Bu da təsərrüfatlara və insanların fərdi yaşayış sahələrinə xeyli zərər verir. Bunlarla bağlı erkən xəbərdarlıq sistemləri işlənəcək. Həmin ərazilərdə yaşayan əhalinin qismən digər sahələrə köçürülməsi planlaşdırılır. Təxminən bu istiqamətdə adaptasiya planları həyata keçirilir”.

Röya İsrafilova