Maliyyə Nazirliyi tərəfindən hazırlanan "2026-2029-cu illəri əhatə edən Ortamüddətli Xərclər Çərçivəsi”ndə qeyd olunub ki, sığorta-pensiya sistemində maliyyə dayanıqlığının artırılması və sığorta prinsiplərinin gücləndirilməsi istiqamətində islahatlar davam etdiriləcək.

Məsələ ilə bağlı xalqcebhesi.az-a danışan iqtisadçı ekspert Ruslan Atakişiyev bildirib ki, pensiya sahəsində islahatların həyata keçirilməsi, həm də sığorta-pensiya istiqamətində aparılan işlər gələcəkdə Azərbaycanda yeni əlçatan sığorta modelləri formalaşdıracaq: “O cümlədən burada özəl pensiya fondlarının formalaşdırılması, illik baş verən inflyasiya və qiymət artımı ilə bağlı olaraq pensiyaların sığorta hissəsinin artırılmasının daha da optimallaşdırılması məsələləri, elektron xidmətlərin gücləndirilməsi, şəffaflığın artırılması kimi məsələlərin əksininin tapması gözlənilir”.

Röya İsrafilova