Portuqaliya hazırda hökumət qərarından sonra ən yüksək hazırlıq vəziyyətindədir, ölkənin mərkəzi və şimal bölgələrində dörd yerdə böyük meşə yanğınları ilə mübarizə aparır.

Xalqcebhesi.az xəbər verir ki, Portuqaliyanın rəsmi xəbər agentliyi Lusa ilə danışan Milli Fövqəladə Hallar və Mülki Müdafiə Agentliyinin (ANEPC) Milli Komandanlıq Əməliyyatları Mütəxəssisi Pedro Araujo, Vila Real, Celorico de Basto, Fafe və Arcos de Valdevezdə davam edən yanğınların bu gün nəzarət altına alına biləcəyini söyləyib.

Araujo, Vila Real və Celorico de Basto'nun şimal bölgələrində iki böyük yanğınla mübarizə səylərində 600-dən çox yanğınsöndürən və 216 yerüstü nəqliyyat vasitəsinin iştirak etdiyini və təyyarələrin də səhər saatlarından etibarən dəstək verəcəyini bildirib.

Portuqaliyanın Daxili İşlər Naziri Maria Lucia Amaral, həddindən artıq istilər səbəbiylə "çətin bir həftə" olaraq xarakterizə etdiyi həftənin meşəlik ərazilərə girmə, orada yanğınlar yandırma, meşəlik və digər kənd yerlərində texnika işlətmə qadağası ilə əlamətdar olacağını açıqladı. O, həmçinin atəşfəşanlıq və ya digər pirotexniki vasitələrdən istifadəyə icazə verilməyəcəyini açıqlayıb.
Ölkədəki bütün yanğınsöndürmə bölmələri üçün icazələr dayandırılıb.

İspaniyada termometrlər 43 dərəcəni keçib.

Oxşar vəziyyət Portuqaliyanın Pireney yarımadasındakı qonşusu İspaniyada da yaşanır.
İspaniyanın altı muxtar bölgəsində həddindən artıq istilər səbəbindən meşə yanğınlarına qarşı tədbirlər gücləndirilib.
Mülki Müdafiə və yerli hakimiyyət orqanları hazırda İspaniyanın şimalındakı Qalisiya və İspaniyanın cənubundakı Ekstremadurada iki aktiv yanğının olduğunu bildiriblər.
Ötən həftə Qalisiyada 1350 hektar meşə yanıb.

İspaniya Meteorologiya İnstitutu (AEMET) avqustun 3-də ölkənin cənubundakı Badajoz və Ciudad Real şəhərlərində termometrlərin 43 dərəcədən yuxarı qalxdığını bildirərək, "Dünən başlayan isti dalğanın ən azı gələn bazar gününə qədər davam edəcəyi gözlənilir" deyib.

Məryəm Quliyeva