Media nümayəndələri AzMİU-da imtahanların gedişini izləyiblər Hadisə

Media nümayəndələri AzMİU-da imtahanların gedişini izləyiblər

Yanvarın 9-da Azərbaycan Memarlıq və İnşaat Universitetində (AzMİU) 2018-2019-cu tədris ilinin payız semestri imtahanlarının gedişini müşahidə etmək üçün mediatur təşkil olunub.
Mediaturda universitetin rəhbərliyi, Milli Məclisin deputatları, ictimai təşkilatların nümayəndələri, təhsil ekspertləri və KİV-lərin təmsilçiləri iştirak ediblər. Mediatur təhsilin keyfiyyətinin artırılması və neqativ halların aradan qaldırılması, eləcə də imtahan sessiyasının obyektiv və şəffaf şəraitdə keçirilməsi barədə ictimaiyyəti məlumatlandırmaq məqsədilə təşkil olunub.
AzMİU-nun rektoru, professor Gülçöhrə Məmmədova qonaqlara universitetdə aparılan islahatlar, görülən işlər və yeniliklər haqqında, imtahan sessiyasının gedişi barədə ətraflı məlumat verib. Bildirilib ki, universitetdə imtahanlar yazılı və test formasında aparılır, bəzi qabiliyyət tələb edən fənlərdən (memarlıq fakültəsində) isə qiymətləndirilmə keçirilir.
Rektor diqqətə çatdırıb ki, universitetdə sessiya imtahanlarının yüksək səviyyədə təşkil olunmasına böyük önəm verilir. Buna görə də sessiyanın gedişi zamanı imtahanların nəticəsindən yarana biləcək narazılıqların araşdırılması və həll edilməsi məqsədilə qərargah və onun nəzdində "Qaynar xətt" yaradılıb. Ali məktəbdə bütün məsələlər "Elektron universitet portalı" vasitəsilə nəzarətə götürülür, istər yazılı, istərsə də test imtahanlarının nəticələri dərhal həmin sistemdə qeydə alınır. Tələbə test imtahanlarının nəticələrini cavabları təsdiq etdikdən dərhal sonra kompüterin ekranından görür. Yazılı imtahanlar da test imtahanları kimi ciddi nəzarətə götürülüb. Yazılar şifrələnir, sonra yoxlanılır, həmin gün qiymətlər tələbələrə elan edilir. Hər günün sonunda istər yazılı, istərsə də test imtahanlarının nəticələri universitetin elektron portalında yerləşdirilir. Rektor bildirib ki, universitetdə özünün sədr olduğu münaqişə komissiyası fəaliyyət göstərir. İmtahan nəticələrindən narazı qalan tələbələr komissiyaya müraciət edib şikayətlərini həll edə bilirlər. "Mən özüm şəxsən imtahanları birbaşa izləmək imkanına malikəm, imtahan zallarında baş verənləri görürəm. Universitet əməkdaşlarından ibarət rəsmi qaydada təyin olunmuş qeyri-ixtisasdan olan nəzarətçilər və imtahan rəhbərləri tərəfindən imtahanların gedişinə ciddi nəzarət edilir. Yazılı imtahanların nəticələrinin şifrələnməsi, işlərin qiymətləndirilməsi, bütövlükdə yoxlama prosesinə nəzarət etmək üçün həmin otaqlarda müşahidə kameraları quraşdırılıb", - deyə G.Məmmədova bildirib.
Sonra iştirakçılar universitetin bir neçə auditoriyasına baş çəkib, imtahanların gedişini və cavabların yoxlanılması prosesini müşahidə ediblər. Müşahidəçilər universitetdə imtahanların yüksək səviyyədə təşkil olunduğunu bildiriblər. Onlar imtahan sessiyasının gedişində nizam-intizam qaydalarına ciddi əməl olunduğunu, eləcə də baş verə biləcək bütün mənfi halların qarşısının alınması üçün lazımi tədbirlərin görüldüyünü vurğulayıblar.
Media nümayəndələri, həmçinin AzMİU-nun memarlıq fakültəsinin yeni binası ilə tanış olublar, layihələndirmə dərslərinin qiymətləndirilməsi otağında tələbələrin işlərinə baxıblar.