“Saakyana “Böyük Pyotr” ordeninin verilməs...” Siyasət

“Saakyana “Böyük Pyotr” ordeninin verilməs...”

Elman Nəsirov: "Nəticə etibarilə separatizmin dəstəklənməsi və genişlənməsi üçün əlavə imkanlar yaradır"

Dağlıq Qarabağın separatçı rejiminin rəhbəri Bako Saakyanın ayrı-ayrı dövlətlərə dəvət alması, onun bu yaxınlarda "Chatham House" beynəlxalq akademiyasında olması, orada çıxış etməsi, bundan əlavə müxtəlif ölkələrə dəvət alıb orada rəsmilərlə görüşlərin təşkil edilməsi nəticə etibarilə Dağlıq Qarabağ münaqişəsinin həllinə xidmət etmir.
Bu fikri mətbuata açıqlamasında YAP-ın Beynəlxalq əlaqələr komissiyasının katibi, politoloq Elman Nəsirov deyib.
"Belə hallar problemin həllinin daha da uzadılması mənafeyinə xidmət edir"-deyən E. Nəsirovun sözlərinə görə, istənilən halda separatçılara haqq qazandırmaq olmaz.
O, deyib ki, separatçılara qarşı müvafiq tədbirlər görülməlidir, mexanizmlər işə salınmalıdır.
Onun dediyinə görə, amma təəssüf ki, biz bunun şahidi deyilik, separatizmlə, terrorizmin nə qədər bir-birinə yaxın olduğu hər kəsə bəllidir.
"Onlar bir-birini tamamlayırlar. Bu nöqteyi-nəzərdən qondarma "DQR"nın rəhbəri Bako Saakyanın Rusiya tərəfindən mükafatlandırılması və ona "Böyük Pyotr" ordeninin verilməsi nəticə etibarilə separatizmin dəstəklənməsi və genişlənməsi üçün əlavə imkanlar yaradır.
Təbii ki, bu, çox mənfi bir haldır və tendensiyadır. Hesab edirəm ki, bu şəkildə münaqişəni həll etmək mümkün olmayacaq. Sözün həqiqi mənasında beynəlxalq birlik, ATƏT-in Minsk qrupu və onun həmsədr dövlətləri bu münaqişəni həll etmək istəyirlərsə o zaman gərək belə addımlar atmasınlar və separatizmin liderinə dəstək göstərməsinlər. Bu, artıq bir president yaradır"- deyə, o, daha sonra qeyd edib.