"Azərbaycan bizim işlədiyimiz vacib tərəfdaşlardan biridir".
Bunu Avropa Komissiyasının Avropa Qonşuluq Siyasəti və genişlənmə danışıqları üzrə baş direktoru Kristian Danielson ADA Universitetində "Avropa İttifaqı - Azərbaycan münasibətləri: yeni qlobal kontekstdə çağırışlar və imkanlar" adlı dəyirmi masada çıxışı zamanı deyib. O bildirib ki, Azərbaycanla Aİ arasında yaxşı əlaqələr var və tərəflər bu əlaqələri inkişaf etdirmək istəyir:
"Avropa İttifaqı Azərbaycanın ən böyük ticarət tərəfdaşıdır və ölkənin ən böyük investorlarından biridir. Əlaqələrimiz enerji sahəsində daha sıxdır. Lakin biz bilirik ki, Azərbaycan iqtisadiyyatın diversifikasiyası siyasətini həyata keçirir. Azərbaycanın bu səylərinə dəstək vermək istəyirik".
Kristian Danielson AK-nin Azərbaycanla yeni razılaşma üzrə danışıqlara başlamaq üçün mandat verdiyini xatırladıb: "Yeni saziş üzrə danışıqlar tezliklə başlayacaq. Bu yeni sənəd əlaqələrin dərinləşməsinə, qarşılıqlı maraq kəsb edən sahələrin, xüsusilə iqtisadiyyatın diversifikasiya sahəsində əlaqələrin inkişafına təkan verəcək".