"Amnesty İnternational" (Beynəlxalq Əfv Təşkilatı) dünyada həyata keçirilən edamların statistikası ilə bağlı hesabatını dərc edib.
APA-nın verdiyi məlumata görə, sənəddə bildirilir ki, 2013-cü ildə dünyada 778 nəfər dara çəkilib. Bu da 2012-ci illə müqayisədə 15%, yəni 100 nəfər çox deməkdir.
Hüquq-müdafiə təşkilatları 2013-cü ildə əsasən İran və İraqda edamların sayının artdığını bildirirlər. Hesabata görə, Çin həyata keçirdiyi edamların sayına görə hələ də dünyada birinci yerdə qərarlaşıb. Rəsmi Pekin edamların sayını rəsmi şəkildə dərc etməsə də, "Amnesty İnternational" bu ölkədə hər il 1000 nəfərin edam cəzasına məhkum olunduğunu bildirir. Siyahıda İran (369 nəfər) ikinci, İraq (169 nəfər) isə üçüncü sıradadır. Lakin edamların sayının bunlardan bir neçə dəfə çox olduğu qeyd edilir.
Qeyd edək ki, İranda İnsan Haqları Müdafiəsi Təşkilatının sözçüsü 2014-cü il martın 11-də Böyük Britaniya Lordlar Palatasında çıxışı zamanı bu ölkədəki edamların sayı ilə bağlı hesabat da təqdim edib. Həmin sənədə görə, İran edamların icrasına görə 2013-cü ildə rekord qırıb. Belə ki, ötən il bu ölkədə 687 nəfər dara çəkilib. Eyni zamanda 2013-cü ildə edamların sayı 2012-ci ilə nisbətin 16% artıb.