Xarici KİV-in verdiyi xəbərə görə, Arktika müasir dünyada ərazi, resurs və hərbi-strateji maraqlar baxımından bir sıra ölkələrin diqqət mərkəzinə gəlib ki, bu da həmin bölgənin münaqişə potensialının artmasına gətirib çıxara bilər.
Bu barədə Rusiya Federasiyası Müdafiə Nazirliyinin (RF MN) kollegiyasında nazir Sergey Şoyqu bəyan edib.
MN mətbuat xidmətinin xəbər verdiyi kimi, hal-hazırda şimal dairələrində nəinki Rusiyanın, həm də Amerika Birləşmiş Ştatlarının (ABŞ), İsveçin, Almaniyanın, Çinin və Cənubi Koreyanın buzqıranları üzür.
Şoyqu qeyd edib ki, Arktikada Rusiyanın milli maraqlarının müdafiəsi silahlı qüvvələrin prioritetlərindən biridir. İkinci tapşırıq – bu bölgədə potensialın artırılmasından ibarətdir.
Nazirin sözlərinə görə, mövcud və proqnozlaşdırılan təhdidlərə adekvat reaksiya verilməsi üçün Şimal donanması nazirliyin kompleks planının reallaşdırılmasını davam etdirir. Bu plan 2020-ci ilə qədərki dövrü əhatə edir.
Bu baharda Şimal donanmasının tərkibinə "İlya Muromets" buzqıranı və "Elbrus" arxa-təminat gəmisi, yayda isə "Admiral Qorşkov" freqatı və "İvan Qren" desant gəmisi verilib. Üstəlik də "Akademik Paşin" tankeri dövlət sınağından keçirilir.
Donanmanın silahlanması ilin axırına qədər davam edəcək.
Bu yay Pentaqonda bəyan ediblər ki, ABŞ Arktikada "oyunu davam etdirməlidir", çünki planetin bu hissəsi getdikcə daha çox əhəmiyyət kəsb edir.