"Naxçıvanda məzar daşlarının forması ilə bağlı qərar təsdiqlənəcək qaydalara uyğundur. Gələcəkdə Azərbaycanın digər yerlərində də məzar daşları Naxçıvandakı kimi olacaq. Burada islami dəyərlərə, milli adət-ənənələrə zidd heç nə yoxdur. Məzarlar biri digərindən kəskin şəkildə fərqlənə bilməz".
Bunu Dini Qurumlarla İş üzrə Dövlət Komitəsinin sədri Mübariz Qurbanlı deyib.
O bildirib ki, "Məzarlıqlar haqqında" layihə Nazirlər Kabinetindədir: "Qərar layihəsi demək olar bütün instansiyalardan keçib, müvafiq nazirliklərin, ekspertlərin rəyi alınıb. Yeni qərar qəbul edildikdən sonra növbəti mərhələlərdə yeni ayrılacaq məzarlıqlar və insanların dəfn mərasimləri və sairə məsələlər həmin qaydalarla tənzimlənəcək".
Dövlət Komitəsinin sədri Bakıda qəbiristanlıqlarda məzar yerlərinin çatışmazlığı məsələsinə də münasibət bildirib. M. Qurbanlı qeyd edib ki, şəhərin ətrafında olan, vaxtilə şəhərdən kənarda olan, indi isə şəhərin ətrafında olan qəbiristanlıqlarda yer çatışmazlığı ola bilər: "Bakı böyük şəhərdir, günü-gündən genişlənir. Bu hal yalnız bizim şəhərə aid deyil, bütün böyük şəhərlərdə bu cür hallarla qarşılaşılır. Bakı Şəhər İcra Hakimiyyəti tərəfindən qəbiristanlıqlar üçün yeni yerlərin ayrılması istiqamətində müvafiq tədbirlər görülür. "Məzar yerləri satılır" ifadəsi doğru deyil. Məzar yerləri satılmır, məzar yerləri insanlara pulsuz verilməlidir. Yeni qaydalarda bu tam aydın şəkildə öz əksini tapıb. Hətta dəfn xərcləri ilə əlaqədar olaraq dövlət sosial proqramlara uyğun olaraq vətəndaşlara yardımlar göstərir. Əgər hardasa "məzar yerləri yoxdur" yazılıbsa, ola bilər həqiqətən yer yoxdur. Komitənin adında "din" sözü olduğuna görə, hamı elə bilir məzarlıqlar, məzarlıqların idarə olunması, məzar yerlərinin ayrılması və s. bizim səlahiyyətimiz daxilindədir. Lakin həm əsasnaməmiz, həm də qanunvericilik komitənin burada hər hansı bir məsələyə müdaxiləsinə yol vermir. Məzarlıqlarda yerlərin ayrılması digər qurumların səlahiyyətinə aiddir. Gələcəkdə qaydalar təsdiq edildikdə, müvafiq icra hakimiyyəti bununla məşğul olacaq. Hətta Dövlət Komitəsinə bəzi məsələlərə nəzarət funksiyası verilə bilər".
"Azərbaycanda aidiyyəti qurumlar İraqdakı Azərbaycan vətəndaşlarının, xüsusilə uşaqların geriyə qaytarılması istiqamətində işləri davam etdirir"-deyən Mübariz Qurbanlı qeyd edib ki, bir nəfər də olsun Azərbaycan vətəndaşı, xüsusən də uşaqlar kənarda qala bilməz: "Suriya və İraqda "İŞİD" terror təşkilatının fəaliyyəti getdikcə aradan qaldırılıb. "İŞİD"-dən azad olunmuş ərazilərdə ayrı-ayrı ölkələrdən gəlmiş şəxslər müəyyənləşdirilir. Azərbaycanda da ora aldadılaraq ailə üzvləri, övladları ilə birlikdə aparılan şəxslər olub. Həmin şəxslərin ölkəyə qaytarılması dövlətin diqqət mərkəzindədir. Qeyri-qanuni silahlı birləşmələrə qoşulan şəxslərə qarşı isə qanunvericiliyə uyğun olaraq cinayət işləri qaldırılıb, onlar qanun qarşısında cavab verməli olacaqlar".
Qeyd edək ki, rəsmi məlumatlara əsasən, İraqda 100-dən çox azərbaycanlı qadın və uşaq var.