Daxili İşlər Nazirliyindən (DİN) verilən məlumata görə, ötən il noyabrın 30-da Bakı şəhər sakini Pərviz Babayevə məxsus "BMW" markalı avtomobilin oğurlanmış dövlət qeydiyyat nişanlarının üzərində olduğu "VAZ-2107" markalı avtomobilin yanvarın 20-də C.Qurbanov küçəsində hərəkətdə olması aşkar edilib.
DİN-in Təhlükəsiz Şəhər Xidməti, Çevik Polis Alayı və Suraxanı rayon Polis İdarəsi 31-ci Polis Bölməsi əməkdaşlarının həyata keçirdikləri tədbirlər nəticəsində avtomobil saxlanılıb. Onun Bakı şəhər sakini Kamran Mürsəlov tərəfindən idarə edilməsi müəyyən olunub.
Avtomobilin yük yerinə baxış zamanı oradan qeyd edilən "VAZ-2107" markalı avtomobilə, həmçinin xarici dövlətlərə - İsveçrəyə və BƏƏ-yə aid dövlət avtomobil qeydiyyat nişanları da aşkar edilərək götürülüb.
Araşdırmalar zamanı qeyd edilən avtomobilin Hüseyn Hüseynliyə məxsus olması və yanvarın 20-nə keçən gecə yaşadığı Əmircan qəsəbəsindən qaçırılması da müəyyən edilib.
Faktla bağlı Suraxanı rayon Polis İdarəsi tərəfindən araşdırma aparılır.