Spikerlə deputat arasında kəskin mübahisə Hadisə

Spikerlə deputat arasında kəskin mübahisə

İlyas İsmayılov: Siz kimsiniz mənimlə belə danışırsınız?!

Milli Məclisin dünən keçirilən iclasında spiker ilə deputat arasında mübahisə yaranıb. İclasda hökumətin illik hesabatının müzakirəsi zamanı çıxış edən deputat İlyas İsmayılov hesabatla bağlı müxtəlif iradlarını bildirib.
Onun çıxışı demək olar ki, hökumətin illik fəaliyyətini sərt tənqid etməkdən, müxtəlif çatışmazlıqlardan misal gətirməkdən ibarət olub.
Çıxışından sonra deputata cavab verən spiker Oqtay Əsədov ona irad tutub: "İlyas müəllim, belə çıxır ki, qalın bir kitabdan ibarət olan hökumətin illik fəaliyyətində müsbət heç nə görmədiniz. Ancaq səhv tutdunuz".
Bu zaman İ.İsmayılov yerdən spikerin sözünü kəsərək ona replika atıb: "Bu mənim öz fikrimdir, mənim çıxışıma irad tuta bilməzsiniz. Öz işinizi görün!"
Deputatın sərt replikası spikeri əsəbiləşdirib: "İrad tutaram, o yana da keçərəm! Bu nə danışıqdır? Günah bizdədir ki, sənin kimisinə şərait yaradırıq, çıxıb danışıb belə hörmətsizlik edirsən".
Bundan sonra İ. İsmayılov səsini yüksəldib: "Siz kimsiniz mənimlə belə danışırsınız?! Mən millətin vəkiliyəm və çıxışıma müdaxilə etməyə heç kimi ixtiyarı yoxdur".
Spiker onun sözünü kəsərək daha sərt cavab verib: "Bir özünə hörmət qoy. Adama hörmət göstərəndə həddini aşmaz! Heç olmasa özünə hörmət qoy!"
Mübahisədən sonra İlyas İsmayılov iclas zalını tərk edib.