Hindistanın Maharaştra ştatının baş nazirinin müavini və Milliyyətçi Konqres Partiyasının lideri Acit Pavar Hindistanda baş verən təyyarə qəzası nəticəsində həlak olub.

Xalqcebhesi.az-ın məlumatına görə, "The Indian Express" qəzeti Mülki Aviasiya Baş İdarəsinə istinadən xəbər verir ki, aviaqəza nəticəsində daha dörd nəfər də ölüb.

İdarənin məlumatına görə, Learjet 45 təyyarəsinin göyərtəsində Pavarla yanaşı, təhlükəsizlik xidmətinin əməkdaşı, stüardessa və iki pilot olub. Qəzet yazır ki, təyyarə Baramati hava limanına eniş zamanı qəzaya uğrayıb.

“Hindistanın Maharaştra ştatının Baramati şəhərində baş verən faciəvi aviaqəza məni dərindən kədərləndirdi. Bu fəlakətdə yaxınlarını itirən hər kəs üçün dualar edirəm. Bu dərin kədər anında həlak olanların ailələrinə güc və səbir arzulayıram”, – deyə Hindistanın baş naziri Narendra Modi X sosial şəbəkəsində yazıb.

Məryəm Quliyeva