“ABŞ və Avropa Birliyi arasında mövcud fikir ayrılıqları NATO daxilində müəyyən gərginlik yaratsa da, bu təşkilatın bütövlüyünü qısa müddətdə sarsıdacaq səviyyədə deyil”.

Bunu politoloq Rəşad Bayramov “xalqcebhesi.az”-a açıqlaması zamanı deyib.

Onun sözlərinə görə, NATO-nun əsas prinsipi kollektiv müdafiə mexanizmi üzərində qurulub və bu prinsip həm ABŞ, həm də Avropa ölkələri üçün strateji əhəmiyyət daşıyır:
“Rusiya–Ukrayna müharibəsi və qlobal təhlükəsizlik risklərinin artması fonunda NATO üzvlərinin bir-birinə olan ehtiyacı daha da artır. Son illərdə Avropa ölkələri “strateji muxtariyyət” ideyasını daha çox gündəmə gətirir və müdafiə sahəsində daha müstəqil mexanizmlər formalaşdırmağa çalışırlar.
Bu, NATO-nun alternativi kimi deyil, daha çox Avropanın təhlükəsizlik imkanlarının gücləndirilməsi kimi təqdim olunur”.

Rəşad Bayramov hesab edir ki, mövcud geosiyasi risklər tərəfləri əməkdaşlığı qorumağa və dialoq mexanizmlərini gücləndirməyə vadar edir: “NATO daxilində münasibətlərin gələcək inkişafı böyük ölçüdə ABŞ və Avropa ölkələrinin təhlükəsizlik maraqlarını necə uzlaşdıracağından asılı olacaq”.

Günel Elxan