“15 İyun Milli Qurtuluş Günü Azərbaycanın müasir dövlətçilik tarixinə sadəcə bir təqvim dəyişikliyi deyil, milli varlığın və müstəqilliyin xilası kimi həkk olunub. Bir politoloq baxış bucağından yanaşsaq, bu tarix ölkəmizin xaos və parçalanma girdabından çıxaraq dayanıqlı inkişaf və geosiyasi subyektlik mərhələsinə qədəm qoymasının başlanğıc nöqtəsidir. Ümummilli Lider Heydər Əliyevin dühası və onun dövlətçilik strategiyası olmasaydı, bu gün Cənubi Qafqazın lider dövlətinə çevrilən müstəqil Azərbaycandan danışmaq qeyri-mümkün olardı”.

Bu fikirləri xalqcebhesi.az-a açıqlamasında politoloq Tural İsmayılov deyib.

T.İsmayılov qeyd edib ki, Ulu Öndərin tarixi xidmətlərinin miqyasını anlamaq üçün onun hələ sovet dövründəki, xüsusilə 1970-1980-ci illərdəki fəaliyyətinə diqqət yetirmək lazımdır: “Məhz həmin illərdə Heydər Əliyev SSRİ kimi nəhəng bir imperiyanın sərt ideoloji çərçivələrinə baxmayaraq, Azərbaycanı geridə qalmış aqrar respublikadan qabaqcıl sənaye, elm və mədəniyyət mərkəzinə çevirdi. Bu dövrdə gələcək müstəqilliyimizin iqtisadi və kadr potensialının təməli qoyuldu. Cəmşid Naxçıvanski adına Hərbi Məktəbin yaradılması, minlərlə azərbaycanlı gəncin SSRİ-nin nüfuzlu ali məktəblərinə göndərilməsi uzaqgörən bir strateqin gələcək müstəqil dövlət üçün hazırladığı milli elita və ordu quruculuğu platforması idi. 1990-cı illərin əvvəllərində isə Azərbaycan öz tarixinin ən ağır geosiyasi böhranını yaşayırdı. Ermənistanın hərbi təcavüzü, daxili siyasi çəkişmələr, idarəolunmaz silahlı qruplaşmalar və vətəndaş müharibəsi təhlükəsi dövlətimizi iflasın və xəritədən silinməyin astanasına gətirmişdi. Belə bir kritik məqamda – 1993-cü ilin iyununda xalqın təkidli tələbi ilə hakimiyyətə qayıdan Heydər Əliyev ilk növbədə daxili sabitliyi təmin etdi, qanunsuz silahlı dəstələri zərərsizləşdirdi və dövlətin varlığını qorudu. 1994-cü ildə "Əsrin müqaviləsi"nin imzalanması ilə Azərbaycanın iqtisadi müstəqilliyinin bünövrəsi qoyuldu, ölkə qlobal enerji xəritəsinə daxil edildi. Ulu Öndər daxili xaosu nizama, xarici təhlükələri isə balanslaşdırılmış xarici siyasətlə strateji tərəfdaşlıqlara çevirməyi bacardı”.

O vurğulayıb ki, bu gün qürurla qeyd etdiyimiz müasir, güclü və suveren Azərbaycan məhz Heydər Əliyev siyasi kursunun triumfudur: “Bu kursun ən layiqli və uğurlu davamçısı Prezident, Müzəffər Ali Baş Komandan İlham Əliyevdir. Dövlət başçısının son 20 ildən artıq dövrdə yürütdüyü uzaqgörən siyasət, iqtisadi islahatlar, ordu quruculuğu sahəsində atılan qətiyyətli addımlar və çevik diplomatiya ölkəmizi həlledici tarixi qələbəyə hazırladı. 2020-ci ilin 44 günlük Vətən müharibəsi və 2023-cü ilin sentyabrında həyata keçirilən lokal antiterror tədbirləri Azərbaycanın hərb və diplomatiya tarixinə qızıl hərflərlə yazıldı”.

Politoloq həmçinin bildirib ki, otuz illik işğala son qoyulması, ərazi bütövlüyümüzün və suverenliyimizin bütün ölkə ərazisində tam bərpası Heydər Əliyev vəsiyyətinin və strategiyasının ən möhtəşəm zirvəsidir: “Şuşada, Xankəndidə, Xocalıda dalğalanan üçrəngli bayrağımız bu siyasi irsin sarsılmazlığının vizual sübutudur. Nəticə etibarilə, 15 İyundan başlanan qurtuluş yolu Azərbaycanı regional gücdən qlobal səviyyədə söz sahibinə çevirdi. Bugünkü müstəqil, suveren və güclü Azərbaycan dövləti Heydər Əliyev dühasının şah əsəri, Prezident İlham Əliyevin rəhbərliyi ilə real reallığa çevrilən milli qürur mənbəyimizdir”.

Röya İsrafilova