Xəzərin Azərbaycan sektorunda yerləşən "Azəri-Çıraq-Günəşli" yataqları blokunun işlənməsi çərçivəsində tikilən "Azəri Mərkəzi Şərqi" (ACE) platformasından indiyədək 2,1 mln. ton neft hasil edilib.

Bu barədə Energetika Nazirliyi xəbər verir.

Məlumata görə, ACE platformasından neft hasilatına başlanılmasından 2 il ötür.

"Hasilata başladığı tarixdən 15 aprel 2026-cı ilədək platformadan 2,1 milyon ton #neft hasil edilib", - məlumatda qeyd olunub.

Xatırladaq ki, 1994-cü il sentyabrın 20-də AÇG-nin birgə işlənməsi və neft hasilatının pay bölgüsü haqqında saziş imzalanıb. 2017 il sentyabrın 14-də AÇG üzrə heft hasilatının pay bölgüsü haqqında sazişə düzəliş edilib və yenidən tərtib olunaraq imzalanıb.

AÇG-də pay bölgüsü bu nisbətdədir: BP – 30,37% (operator), AzACG (SOCAR) – 31,65%, MOL – 9,57%, "Inpex" – 9,31%, "ExxonMobil" – 6,79%, TPAO – 5,73%, "Itochu" – 3,65% və "ONGC Videsh Ltd." (OVL) – 2,92%.