Bu ilin sonuna qədər baza infrastrukturu ilə bağlı əsas layihələr yekunlaşacaq.

Bunu jurnalistlərə açıqlamasında Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Prezidentinin xüsusi nümayəndəsi Emin Hüseynov deyib.

O qeyd edib ki, gələn ildən isə sosial təsisatlar, yəni şəhərin mərkəzi və ətraf kəndlərlə bağlı bərpa-yenidənqurma işlərinə başlanılacaq

"Yəni Böyük Qayıdış üçün, işğaldan azad olunmuş ərazilərə tam normal həyatın qayıtması üçün tələb olunan əsas layihələrə start veriləcək", - E.Hüseynov vurğulayıb.

Prezidentin xüsusi nümayəndəsi bildirib ki, əhalinin qısa müddətdə öz doğma torpaqlarına qayıtması üçün gələn il çox intensiv tikinti işləri həyata keçiriləcək.

“Hesab edirik ki, yaxın 2-3 ilə artıq həm Ağdam şəhərinə, həm ətraf kəndlərə, həm də Füzuliyə, Xocavəndə və Tərtərin işğaldan azad olunmuş ərazilərinə bizim soydaşlarımızın Böyük Qayıdışını görə biləcəyik”, - deyə o əlavə edib.