Qoşulmama Hərəkatının 70-dən çox üzvünün bu gün Bakıda növbəti yığıncağı öz işinə başlayıb. 2011-ci ildən bu təşkilata üzv olan Azərbaycan 2016-cı ildən bu təşkilatın sədridir. Azərbaycanın uğurlu sədrliyi və bu təşkilatın inkişafına verdiyi töhfələrin nəticəsi olaraq onun sədrliyini bir neçə dəfədir ki, uzadırlar. Azərbaycan koronovirus pandemiyası dövründə təşkilatın üzvlərinin təmas və yardımlarının əlaqəli uzlaşdırılmasını uğurla tətbiq edə bilmişdi.

Bunu "Xalq Cəbhəsi"nə politoloq Azər Qasımov deyib.

Politoloq qeyd edib ki, təşkilat üzvləri də Azərbaycana olan inam və dəstəklərini Ermənistanla olan 44 günlük müharibə dövründə BMT-də qəbul edilməsi planlaşdırılan Azərbaycan əleyhinə qətnaməni blok etməklə cavablandırıb, Azərbaycanın haqlı mövqeyini dəstəkləyiblər: "Prezident İlham Əliyevin şəxsi səyləri nəticəsində Qoşulmama Hərəkatı dünya miqyasında BMT-dən sonra ikinci böyük təşkilat səviyyəsinə qalxıb.
Cənab Prezidentin bu günkü çıxışında Fransanın müstəmləkə siyasətinə qarşı etiraz etməsi və Fransanın bu xalqlardan üzür istəməli olmasını deməsi bir daha onu göstərir ki, bu təşkilat və onun Azərbaycanın arxasında dayanan ölkələri bu fikirləri dəstəkləyir və Azərbaycan Prezidentinə etimad edirlər. İştirak edən qonaqların çoxluğu və tərkibi bir daha onu göstərir ki, həmin dövlətlər Qoşulmama Hərəkatında gələcəyin güclü və sözü keçə bilən bir dünyəvi qurumunun gücünü görür və hiss edirlər. Bir çox hallarda BMT-nin aldığı qərarları kağız üzərində qaldığı bir şəraitdə, Təhlükəsizlik Şurasının beş daimi üzvlərinin maraqlarının əsas götürüldüyü bir quruma alternativ axtarışları hesab edirəm ki, Qoşulmama Hərəkatının sıralarını daha da möhkəmləndirəcək və ən azı BMT-yə bərabər quruma çevriləcəyi mütləqdir. Bu hərəkata cəlb olunan dövlətlərin adından da bəlli olduğu kimi dünyada sülh və əmin-amanlıq üçün heç bir hərbi və siyasi qurumlara qoşulmaq fikrinin olmadı məlum olur. Bu durumda belə dövlətlərin üzv olduğu bir təşkilat əslində dünyada BMT-nin rolunu oynamağa daha çox layiq olur, nəinki BMT kimi bəzi özünü hegemon hesab edən, bir neçə dövlətin sözü əsas götürüldüyü və bir çox dövlətlərdə bunun etirazla qarşılandığı bir qurum".

Cavid