Maksim Şinqarkin: "Putin bunu diplomatik dillə Ermənistan rəhbərliyinə izah edə biləcək"

Rusiya Azərbaycan və Ermənistan arasında düşmənçilik münasibətlərinin olmasında maraqlı deyil. Rusiya xalqı qonşu ölkələrdə sülh olmasında maraqlıdır. Bu baxımdan Rusiya prezidenti münaqişənin tezliklə həlli üçün kompleks tədbirlərin görülməsinə yardım edir.
Bu sözləri "Report"a müsahibəsində Rusiya Dövlət Dumasında Liberal Demokrat Partiyasını (RLDP) təmsil edən deputat Maksim Şinqarkin deyib.
Rusiyalı deputatın qənaətinə görə, Vladimir Putin görüşdə Azərbaycanın və Ermənistanın regionda sabitliyin xalqlarımızın maraqları çərçivəsində təmin olunması üçün əllərindən gələni etməli olduqları barədə danışacaq: "İndi Rusiyanı daha çox müharibənin cənginə aldığı Suriyaya quru yolu ilə marşrutun açılması maraqlandırır. Bu məsələdə Rusiya, Azərbaycan və İran arasında ittifaqın yaradılması geosiyasi oyunun komponentlərindən biridir. Rusiya Suriyadakı sülhməramlı səylərinin dəstəklənməsi üçün Ermənistan və Azərbaycan arasında sülhün təmin olunmasını vacib hesab edir. Yaxın Şərqdəki vəziyyət rəsmi Moskvanın bu məsələni uzatmamasını şərtləndirir".
Maksim Şinqarkin hesab edir ki, Rusiya Ermənistana təsir etmək üçün böyük iqtisadi təzyiq vasitələrinə malikdir: "Çünki ölkə iqtisadiyyatı əhəmiyyətli dərəcədə Rusiyadan asılıdır. Rusiya bögədə sabitliyin bərqərar olunması və qorunub saxlanması istiqamətdə davamlı siyasət həyata keçirir.
Rusiya Dağlıq Qarabağ münaqişəsində hər zaman sərhədlərin pozulmamasının lehinə çıxış edib. Çünki bu amil dünya ictimaiyyəti tərəfindən tanınıb. Burada hər hansı birtərəfli dəyişmələr mümkün deyil. Bu günün geosiyasi reallığı bu tezisi təsdiq edir. Bu da regionda yaşayan xalqların səadəti üçündür. Revanşizm mövqeyindən çıxış edənlər öz legitimliyini itirir.
Keçmiş SSRİ-nin ərazisində Qərbə inteqrasiya etmək istəyən dövlətlər mövcuddur. Bu, həmin ölkələrin iqtisadiyyatının iflasına gətirib çıxarıb. Eyni zamanda, bu tendensiya həmin ərazilərdə yaşayan xalqlar tərəfindən dəstəklənməyib. Bunu İrəvanda da dərk edirlər. Oradakı siyasətçilər Rusiya ilə münasibətlərdən imtina edilməsi vəziyyətində ölkə suverenliyinin mühüm təməllərini itirəcəyini, bunun da Ermənistanın vahid dövlət kimi mövcudluğunu sual altına qoyacağını başa düşürlər. Düşünürəm ki, prezident Vladimir Putin bunu diplomatik dillə Ermənistan rəhbərliyinə izah edə biləcək".