Pakistan Hind okeanında kollektiv təhlükəsizliyin təmin edilməsi məqsədi ilə Hərbi Dəniz Donanması Alyansının yaradılması barədə İranın təklifini nəzərdən keçirəcək.

APA xəbər verir ki, bu barədə Pakistan Xarici İşlər Nazirliyinin mətbuat katibi Mümtaz Zəhra Bəluç bu gün keçirdiyi brifinqdə bildirib.

Qeyd olunub ki, təklif olunan Alyansa Bəhreyn, Səudiyyə Ərəbistanı, Birləşmiş Ərəb Əmirlikləri (BƏƏ), Hindistan və Pakistan hərbi dəniz donanmalarının daxil olması planlaşdırılır.

Xatırladaq ki, İran Hərbi Dəniz Qüvvələrinin komandanı kontr-admiral Şəhram İrani bir müddət əvvəl Hind okeanı zonasında Bəhreyn, Səudiyyə Ərəbistanı, Birləşmiş Ərəb Əmirlikləri, Hindistan və Pakistan donanmalarının da daxil olduğu alyans yaratmağı təklif edib.