Ukrayna Prezidenti Volodimir Zelenski Rusiyanın dünən Krivoy-Roqaya hava zərbələri endirdiyini açıqlayıb.

V.Zelenksi açıqlamasında "Rusiyanın raket hücumunun baş verdiyi Krivoy-Roqda xilasetmə əməliyyatı bütün gecəni davam etdi. Ballistik raketlər bir otelə düşüb. Hücum nəticəsində 4 nəfər həyatını itirib. Onların ailələrinə və yaxınlarına başsağlığı verirəm. Ümumilikdə 30-dan çox insan xəsarət alıb və hamısına lazımi yardım göstərilib. Hücum zamanı otelin ətrafındakı bir çox mülki əşyaya da ziyan dəyib” deyə bildirib.

O, hadisə yerində xilasetmə qruplarının hələ də işlədiyini deyib.

Rəsmilərin bildirdiyinə görə, oteldən əlavə 14 yaşayış binası, poçt şöbəsi, iyirmiyə yaxın avtomobil və 12 mağaza zərər görüb.