Suriyada "Hizbullah" qruplaşması üçün nəzərdə tutulan böyük silah partiyası ələ keçirilib.

Bu barədə "Al Hadath" telekanalı İraq kəşfiyyatındakı mənbələrə istinadla məlumat yayıb. Qaçaqmalçıların müasir silahları İraqdan Suriyaya neft daşıyan xüsusi sisternin daxilində gizlətdikləri aşkarlanıb.

Suriya Daxili İşlər Nazirliyinin məlumatına görə, ələ keçirilən hərbi yükün tərkibində uzaqmənzilli raketlər, tank əleyhinə idarəolunan mərmilər və pilotsuz uçuş aparatları (PUA) olub. İlkin araşdırmalar göstərir ki, bu silahlar Suriya ərazisindən tranzit keçməklə Livandakı "Hizbullah"ın silahlı dəstələrinə çatdırılmalı idi.

Hadisə ilə bağlı İraq hökuməti hərbi kəşfiyyat rəisinin rəhbərliyi altında xüsusi komissiya yaradaraq sərhəd bölgəsində geniş təhqiqata başlayıb.