Avropa Liqasının qrup mərhələsi çərçivəsində dünən keçirilən "Qəbələ" – PAOK oyunundan (0:0) sonra "qırmızı-qaralar"ın yarımmüdafiəçisi Aleksey Qay jurnalistlərin suallarını cavablandırıb. Apasport.az saytının əməkdaşının da iştirak etdiyi müsahibədə ukraynalı futbolçu maraqlı fikirlər səsləndirib.



- Oyunla bağlı fikrinizi bilmək maraqlı olardı..

- Qrupda ilk oyunumuz idi. Qolsuz heç-heçəni aktivimizə yazmaq olar. Komanda şəklində layiqli mübarizə apardıq. Azarkeşlərin də matçdan razı qaldığını düşünürəm.



- Qələbə qazanmaq üçün komandada nə çatmadı?

- Fasiləyə qədər elə də yaxşı oyun nümayiş etdirə bilmədik. Ola bilsin, həyəcanlı idik, bu ondan qaynaqlanırdı. Amma ikinci hissədə fəallaşdıq. Təəssüf ki, yaratdığımız imkanlardan maksimum istifadə edə bilmədik. Bunu etmək üçün şansımız var idi.



- Komandada hücumçu problemi aşkar görünürdü. Deyəsən, yeni transferlər də bu boşluğu doldura bilməyib?

- Ön xətdə bir qədər soyuqqanlı oynamaq, sakit olmaq lazım idi. Bunun üzərində işləməliyik. Çünki bu qədər şansımız ola-ola qol vura bilmiriksə, deməli, işləməliyik.



- Bu görüşdə "Qəbələ" 1 xal qazandı, yoxsa 2 xal itirdi?

- İndi bu haqda danışmağın, düşünməyin mənası yoxdu. Düşünməklə guya nə isə qazanacağıq? Əlbəttə, qol vura bilsəydik, qələbə də qazana bilərdik. Növbəti oyunlara hazırlaşmalıyıq.



- Çempionatda tətbiq edilən limit avrokuboklardakı oyununuza təsir edəcəkmi?

- Məncə, təsir etməyəcək. Geniş heyətimiz var. Buna görə "Qəbələ" üçün problem olmayacaq. Təcrübəli oyunçularımızın sayı kifayət qədərdi. Həm çemponatda, həm də avrokuboklarda inamlı çıxış etmək üçün əlimizdən gələni edəcəyik. Hansısa oyunda 1-2 futbolçu olmayanda onların yoxluğunu hiss etdirməməliyik.



- Mərkəzdə Derlis Meza Kolli ilə birgə çıxış etdiniz. Yeni komanda yoldaşınızla anlaşmanız necə alındı?

- Derlis meydanda nə etməli olduğunu yaxşı bilən, güclü futbolçudu. O da komandamıza kömək etmək üçün gəlib.