"Azərbaycan sürətlə inkişaf edir, beynəlxalq konvensiyalara qoşulur. Bu baxımdan ölkənin təhlükəsizlik məsələləri ön plana çəkilir və dövlət aparatında islahatların həyata keçirilməsi zərurəti yaranır".
Bu fikirləri Yeni Azərbaycan Partiyasının icra katibinin müavini, deputat Siyavuş Novruzov Referendum Aktını şərh edərkən deyib.
YAP funksionerinin sözlərinə görə, istər qanunvericilik, istər icra, istər vətəndaşların hüquq və azadlıqları ilə bağlı, onların təhlükəsizliyinin təminatı ilə bağlı müəyyən məsələlər ortaya çıxır ki, bunların konstitusion normalarla möhkəmləndirilməsi üçün zərurət yaranır: "Bu baxımdan irəli sürülən konstitusiyaya əlavə və dəyişikliklərlə bağlı Referendum Aktı günün tələbidir.
Nəzərə alsaq ki, Azərbaycan Respublikasının Konstitusiyası 20 il bundan əvvəl qəbul olunub, sonradan referendumla bir neçə dəyişiklik edilib. Gənc dövlət kimi Azərbaycanın fəaliyyəti, inkişafı, dünya dövlətləri arasında özünə yer tutması, beynəlxalq konvensiyalara qoşulması belə bir zərurət yaranıb ki, konstitusiyada müəyyən maddələrə dəyişikliklər edilsin. Bu qarşıya qoyulan məqsədlərə nail olunmasına xidmət edir. Konstitusiya Məhkəməsi daxil olunan müraciətə baxdıqdan sonra referendumla bağlı qərar veriləcək və göstərilən müddət ərzində referendum keçiriləcək".
Layihədə Silahlı Qüvvələrlə bağlı edilən dəyişikliyə münasibət bildirən S.Novruzov qeyd edib ki, Silahlı Qüvvələr geniş anlayışdır.
"Silahlı Birləşmələr dedikdə onun tərkibində çoxsaylı qoşun növlərinin olmasından söhbət gedir. Bu dəyişikliklər qeyri-qanuni silahlı birləşmələrin yaradılmasının qarşısının alınması məsələsini gündəmə gətirir. Bu, dünyada son zaman yaşanan hadisələrlə bağlıdır. Yəni, təhlükəsizlik məsələlərindən doğan zərurətdir. Bu baxımdan onun konstitusion norma ilə özünün təsdiqini tapması vacibdir".
Layihədə nəzərdə tutulan yaş həddinə gəlincə, S.Novruzov bildirib: "Burada düzgün olaraq norma göstərilib ki, adətən müxtəlif dövlətlərdə, həm təyinatlı vəzifələrə, həm də seçkili vəzifələrə fərqli yaş hədləri müəyyənləşdirilir. Burada yaş həddinin müəyyənləşdirilməsi bəzən insanların hüquqlarının pozulmasına gətirib çıxara bilir. Bu, onsuz da başqa normalarda öz əksini tapır.
Məsələn, prezident seçilmək üçün seçki hüququna malik şəxs ali təhsilli olmalıdır. Bu artıq ali təhsil alması üçün həmin şəxsi müəyyən yaş həddinə gətirib çıxarır. Hazırki qanunvericilikdə vətəndaş 35 yaşına qədər prezident, 25 yaşına qədər Milli Məclisin üzvü, 21 yaşına qədər bələdiyyə üzvü seçilə bilməz, 30 yaşından aşağıdırsa, baş nazir, yaxud hakimliyə namizəd ola bilməz. Yen layihədə bu kimi normalar aradan qaldırılır. Bu çox demokratik normadır ki, vətəndaşlara tam şəkildə sərbəstlik verilir. Yəni, vətəndaşlar özlərinin seçmək və seçilmək hüquqlarından tam şəkildə istifadə edə bilsinlər".
S.Novruzov qeyd edib ki, Azərbaycanda dövlət struktuları mütəmadi olaraq təkmilləşir: "Dünyada Azərbaycanın mövqeyini nəzərə alsaq, getdikcə dövlətin işləri çoxalır. Bu baxımdan səlahiyyətli orqanların olmasına zərurət var. Vitse-prezident kimi dövlət strukturları bizi əhatə edən ayrı-ayrı dövlətlərdə də mövcuddur.
Vitse-prezident bilavasitə prezidentin fərmanı ilə təyin olunur və ölkənin idarə olunmasında, beynəlxalq əlaqələrinin qurulmasında, vacib dövlət əhəmiyyətli sənədlərin imzalanmasında və digər məsələlərdə iştirak edir".
"Vitse-prezidentlik institunun yaranaması ilə baz nazir postu ləğv ediləcəkmi?" sualına S.Novruzov belə cavab verib: "Referendum aktında da göstərilir ki, baz nazirlik institutu nəzərdə tutulub. Yəni, dəyişikliklərdə Nazirlər Kabinetinin ləğv olunması ilə bağlı norma yaxdur. Ona görə də hazırkı konstitusion norma öz qüvvəsində qalır".