Həsən Abbasnijad: "Əgər yaya qədər konkret addım atılmasa, gölün xilas edilməsinə ümid qalmayacaq"

İranın Qərbi Azərbaycan əyalətinin Ekologiya İdarəsinin sədri Həsən Abbasnijad bildirib ki, "bu ilin yayına qədər Urmiyə gölünün xilas edilməsi üçün addım atılmasa, gölün cənub hissəsini itirəcəyik və bundan sonra onun xilası mümkün olmayacaq."
H.Abbasnijad, Urmiyə gölünün xilas edilməsi ilə bağlı təşkil edilmiş İşçi qrupunun son iclasında quruma prosesinin sürətlə artdığını deyib: "Baş verən problemlər nəticəsində göl suyu hər gün azalaraq 7%-ə enib. Hazırda göldə 2.3 milyard kubmetr (metr-i mükəəb) su qalıb. Göldə duzluluğun miqdarı artaraq, hər litrdə 400%-ə (promil) çatıb. Bu, dünyada ən duzlu su hesab edilir. Əgər yaya qədər konkret addım atılmasa, gölün xilas edilməsinə ümid qalmayacaq".
H.Abbasnejad deyib ki, İran hazırda su böhranı mərhələsindədir: "Ölkə növbəti 13 il ərzində də su böhranının şahidi olacaq".
İranın Qərbi Azərbaycan vilayətinin Ətraf Mühitin Mühafizəsi İdarəsinin müdiri həmçinin Urmiya gölünün üç il ərzində bərpa edilməsi üçün 140 mlrd. riyal kredit (təxminən 5.5 mln. dollar) götürülməsi planlaşdırıldığını da vurğulayıb.
Qeyd edək ki, Urmiya gölü İranın Şərqi və Qərbi Azərbaycan vilayətlərinin ortasında yerləşir. Sahəsi təxminən 6 min kv. km olan Urmiya gölünün 70 faizi 50 il ərzində tamamilə quruyub və şoranlığa çevrilib. Göldəki suyun səviyyəsi isə 1995-ci ildən azalmağa başlayıb. Artıq Urmiya gölünün ərazisi çox kiçilib və 5 adanın ətrafındakı su tamamilə quruyub. Mütəxəssislər duz fırtınalarının baş verəcəyi və insanların sağlamlığına, təsərrüfata xeyli ziyan vuracağı barədə dəfələrlə xəbərdarlıq ediblər.
İran rejimi uzun illərdir qurumaqda olan Urmiyə gölünün qurtarılması istiqamətində heç bir əməli iş görmür. Göl tamamilə quruyacağı təqdirdə isə on milyonlarla insan həyatı təhlükə altında qalacaq və bölgədək köçmək məcburiyyətində qalacaq.