"Qlobal neft bazarında 2026-cı ildə təklif tələbi üstələməyə davam edəcək, bu isə neft qiymətlərinə təzyiq göstərə bilər".

“APA-Economics” xəbər verir ki, bu barədə "Fitch Ratings" beynəlxalq reytinq agentliyindən bildirilib. Qeyd edilib ki, 2026-cı ildə Brent markalı neftin orta qiymətinin 63 ABŞ dolları/barel səviyyəsinə enəcəyini proqnozlaşdırır. Müqayisə üçün, 2025-ci ildə bu göstərici 69 dollar/barel səviyyəsində qiymətləndirilir.

Agentliyin məlumatına görə, 2025-ci ildə qlobal neft hasilatı əhəmiyyətli dərəcədə artıb və bu artımın 2026-cı ildə də davam edəcəyi gözlənilir. Həm OPEC+, həm də OPEC+ xaricində olan ölkələrdə neft istehsalı tələbdən daha sürətlə artır.

Fitch bildirir ki, neftə tələbin artımı zəifləyib. Buna səbəb qlobal iqtisadi artımın yavaşlaması, enerji səmərəliliyinin yüksəlməsi, elektrikli avtomobillərin sayının artması və petrokimya sektorunda zəiflikdir.

Agentlik qeyd edir ki, 2025-ci ilin sonlarında bazarda yığılan neft ehtiyatları 2026-cı ildə anbarlara daxil ola bilər. Xüsusilə ABŞ və Avropa kimi iri bazarlarda ehtiyatların artması qiymətlərin daha da azalmasına səbəb ola bilər.

Fitch-in qiymətləndirməsinə görə, mövcud şəraitdə neft bazarında profisit qalacaq, bu isə şirkətləri xərcləri azaltmağa və investisiyaları daha ehtiyatla planlaşdırmağa məcbur edəcək.