Qabil Hüseynli: "Ancaq hazırkı sədr Almaniya bu məsələdə müəyyən canlanma yarada bilər"

"ATƏT Minsk Qrupuna yeni səlahiyyətlər verməklə, xüsusilə də həmsədrlər dövlətlərin hər biri ilə ayrılıqda danışıqlara başlamaqla Qarabağ prosesində irəliləyişlərə nail olmaq olar". Bu barədə politoloq Qabil Hüseynli danışıb. Sabiq dövlət müşaviri hesab edir ki, bu yolla məsələni qismən də olsa, Rusiyanın inhisarından çıxarmaq mümkün olacaq: "Bu, Qarabağ məsələsinin BMT-nin qətnamələri zəminində həlli üçün çox önəmli addım ola bilər. Düzdür, ATƏT-in tam tərkibi və fəaliyyəti bizi qane etmir, ancaq hazırkı sədr Almaniya bu məsələdə müəyyən canlanma yarada bilər. Almaniya münaqişənin həlli yolunun işğal edilmiş ərazilərdən erməni qoşunlarının çıxarılmasından keçdiyini bəyan edib. ABŞ isə bundan da sərt bəyanat verib. Moskva nala-mıxa vursa da, Azərbaycanın ərazi bütövlüyünü tanıyır. Ancaq əl altından da Ermənistana silah göndərir. Belə olan şəraitdə nəzərə alsaq ki, Qərbin bu bölgəyə strateji marağı getdikcə artır, söhbət təkcə neft və qaz ehtiyatlarından, eləcə də nəqliyyat dəhlizlərindən getmir, Azərbaycanın geosiyasi əhəmiyyəti böyüyür. Ona görə də ATƏT Minsk Qrupuna yeni səlahiyyətlər verməklə, xüsusilə də həmsədrlər dövlətlərin hər biri ilə ayrılıqda danışıqlara başlamaqla Qarabağ prosesində irəliləyişlərə nail olmaq olar". Politoloq prezidentlərin görüşünün baş tutması üçün Ermənistan tərəfinin müəyyən addımlar atmalı olduğunu qeyd edib: "İrəvan ilk növbədə öz mövqeyini aydınlaşdırmalı, beş deyil, ən azı yeddi rayondan qoşunlarını çıxarması barədə bəyanat verməlidir. Çünki Azərbaycan hazırda elə bir geosiyasi üstünlüyə malikdir ki, mütləq bunu gerçəkləşdirmək üçün danışıqların ümumi məzmununda dəyişikliklər tələb edəcək".
Qeyd edək ki, Azərbaycan və Ermənistan prezidentlərinin mayın 16-da Vyanada görüşə biləcəkləri barədə məlumat yayılıb.