Bu, mənim Azərbaycana üçüncü səfərimdir. Daha öncə Azəbaycana prezident seçkilərini müşahidə etməyə gələn Avstraliya nümayəndə heyətinin tərkibində səfər etmişəm. Budəfəki səfərimin məqsədi Azərbaycanın işğaldan azad olmuş ərazilərinə dəymiş ziyanı öz gözlərimlə görmək və Azərbaycan hökumətinin burada həyata keçirdiyi yenidənqurma işlərini daha yaxından izləməkdir.

Bunu mayın 12-də Şuşaya səfər edən avstraliyalı vəkil Steven Blyth AZƏRTAC-ın bölgə müxbirinə deyib.

“Dünən Ağdam məscidini ziyarət etmək bizə nəsib oldu. Təkcə Ağdamda deyil, digər azad edilmiş Azərbaycan ərazilərində də infrastruktur sürətlə inkişaf etdirilir. Biz sonra Xankəndidə olduq, indi isə Şuşadayıq. Hər yerdə sürətli yenidənqurma işləri gedir. Hökumət göstərdiyi səylərə və bərpa üçün sərf etdiyi resurslara görə təqdir olunmalıdır. Prezidentiniz və hökumətiniz alqışalayiqdir. İşğal dövründə buralara dəymiş ziyanın həcmi çox böyükdür. Beləliklə, hələ çox şey yenidən qurulmalıdır. Yəqin ki, bir neçə ildən sonra buralara təkrar gələndə yenidən qurulmuş, çiçəklənən və insanların normal həyata döndüyü bir bölgə görəcəyəm. Azərbaycan inkişaf edən ölkədir. Ölkəniz böyük addımlarla irəli gedir”, - deyə avstraliyalı vəkil bildirib.

Qeyd edək ki, Steven Blyth Avstraliyanın müxtəlif şəhərlərində keçirilən və Azərbaycanla bağlı təşkil olunan tədbirlərin fəal iştirakçısıdır. Avstraliya–Azərbaycan Dostluq Cəmiyyətinin yaradılmasının təşəbbüskarlarından olan Steven Blyth, eyni zamanda, Avstraliyada erməni lobbisinin anti-Azərbaycan təbliğatına qarşı fəal şəkildə mübarizə aparır. Avstraliya–Azərbaycan Dostluq Cəmiyyətinin üzvləri Avstraliyanın müxtəlif şəhərlərində Xocalı soyqırımının anım günləri ilə bağlı tədbirlər keçirir, həmçinin bu ölkənin hökumət və parlament rəsmiləri ilə görüşlərdə ölkəmiz haqqında məlumatlar təqdim edirlər.