Zelenski: Tramp hava hücumundan müdafiə təchizatını mineral müqavilənin bir hissəsi kimi nəzərdən keçirəcəyini vəd edib
Birləşmiş Ştatların ABŞ-Ukrayna İnvestisiyalarının Bərpası Fonduna verdiyi töhfə qabaqcıl hava hücumundan müdafiə sistemlərini əhatə edə bilər. Xalqcebhesi.az TSN telekanalına istinadən xəbər verir ki, bunu Ukrayna prezidenti Vladimir Zelenski deyib.
O, bu ideyanı ABŞ prezidenti Donald Trampa təqdim etdiyini bildirib. O cavab verdi ki, amerikalılar bunun üzərində işləyəcəklər, lakin “bunlar pulsuz şeylər deyil”.
Zelenski ümid etdiyini bildirib ki, sözügedən fondun yaradılması və Ukraynanın mineral ehtiyatlarına dair sazişin imzalanması gələcək Amerika investisiyalarının qorunmasını təmin edəcək.
Ukrayna prezidenti əlavə edib ki, o, respublikanın ABŞ-dan silah alışına çıxış imkanı əldə etmək istərdi.
Zelenski həmçinin bildirib ki, Amerika hakimiyyəti Vaşinqton və Kiyev arasında nadir torpaq metalları haqqında sazişin ratifikasiyasına səs verməyən Ukrayna partiyalarının üzvlərinə qarşı sanksiyalar tətbiq etməlidir.
Aprelin 30-da Vaşinqton və Kiyev nadir torpaq metallarına dair saziş imzalayıblar. Müqavilə İnvestisiya Fondunun yaradılmasını nəzərdə tutur, onun fəaliyyəti Ukrayna və ABŞ arasında hasilat sektorunda birgə layihələrin həyata keçirilməsi ilə bağlı olacaq.
Müqavilənin ratifikasiyası ilə bağlı səsvermə mayın 8-nə təyin edilib.
Ölkənin baş naziri Denis Şmıxal İnvestisiya Fondunun ABŞ-da qeydiyyatdan keçəcəyinə aydınlıq gətirib. Eyni zamanda, faydalı qazıntıların hasilatından əldə olunan gəlirin köçürüləcəyi hesab da Ukraynada qeydə alınacaq.

Məryəm