2026-cı ilin əvvəlinə qədər Rusiyada yaşayan xarici vətəndaşların sayı 5,7 milyona qədər azalıb.

APA-nın Moskva bürosu xəbər verir ki, bu barədə Daxili İşlər Nazirliyinin Miqrasiya Xidmətinin Analitik şöbəsinin müdiri Aleksandr Perejoqin bildirib.

Onun sözlərinə görə, bu, illik müqayisədə 10% azalma deməkdir, belə ki, ötən ilin əvvəlində bu rəqəm təxminən 6,3 milyon olub.

Perejoqin vurğulayıb ki, miqrantların sayının azalması əsasən ölkədə yetkinlik yaşına çatmayan xarici vətəndaşların sayının təxminən dörddə bir azalması ilə əlaqədardır.

Ekspertlər hesab edirlər ki, Rusiya Federasiyasında xarici vətəndaşların sayının azalması, ümumilikdə miqrasiya qanunvericiliyinin sərtləşdirilməsi ilə də bağlıdır. Belə ki, əvvəllər qanunları pozan əcnəbilər polis tərəfindən saxlanılana qədər Rusiyada qala bilirdilərsə, indi onlar dərhal nəzarət altında olan şəxslərin reyestrinə əlavə olunurlar. Qanunvericiliyə dəyişikliklərdən əvvəl xarici vətəndaşlar hesablarındakı vəsaitlərdən istifadə edə bilirdilər. Lakin artıq reyesterə düşmüş xarici vətəndaşın bank hesabları avtomatik bloklanır.