Ermənistan-Türkiyə münasibətlərinin normallaşdırılması üzrə xüsusi nümayəndəsi, Milli Məclisin sədr müavini Ruben Rubinyan iki ölkə arasında münasibətlərin normallaşdırılmasını sürətləndirmək üçün tarixi bir fürsətin yarandığını bildirib.

Rubinyan bunu "Yerevan Dialoqu" konfransında panel müzakirəsi zamanı bildirib.

O, Ermənistan-Türkiyə münasibətlərinin normallaşması prosesində böyük addımlar atmağın vaxtı çatdığını vurğulayıb.

Rubinyan, prosesin 2022-ci ilin əvvəlində Türkiyənin xüsusi nümayəndəsi Serdar Kılıçla birgə başladığını və bu müddət ərzində artıq müəyyən irəliləyişlər əldə edildiyini qeyd edib.

“Heç nə baş verməyib demək deyil. İrəvan -İstanbul uçuşları bərpa edilib, Türkiyə aviaşirkətləri artıq bu il İrəvana uçuşlar həyata keçirməyə başlayıb və onların genişləndirilməsi müzakirə olunur”, - deyə Rubinyan qeyd edib.

O, həmçinin tərəflərin hava tranziti daşımaları imkanlarını açdıqlarını vurğulayıb.

Rubinyan xatırladıb ki, Ani şəhərindəki tarixi körpünün bərpası ilə bağlı birgə protokol da imzalanıb.

Eyni zamanda, Rubinyan qeyd edib ki, Ermənistan və Azərbaycan arasında münasibətlərin normallaşdırılması prosesi hazırda Ermənistan və Türkiyə arasında gedən prosesdən daha irəli gedir.

"Bu yaxşıdır, amma Ermənistan-Türkiyə münasibətlərinin normallaşmasında daha böyük irəliləyiş əldə etmək üçün tarixi bir fürsətimiz var", - deyə o bildirib.

Rubinyan ümumi regional vəziyyətə də toxunaraq Cənubi Qafqazda yeni reallıqların formalaşdığını qeyd edib.

Onun sözlərinə görə, əvvəllər yalnız münaqişə ilə məhdudlaşan Ermənistan və Azərbaycan arasında münasibətlər artıq formalaşıb.