Elmira Axundova: ""Avro-4"ə keçidi elan etməklə məsələ həll olunmur"

Milli Məclisin deputatı Elmira Axundova parlamentin dünənki iclasında Bakı şəhərinin çirklənməsilə bağlı məsələyə toxunub. O deyib ki, paytaxtımız dünyanın ən çirkli şəhərləri siyahısında Bakı birinci yerdə durur.
Belə siyahının tam dəqiqliyinə inanmadığını qeyd etsə də, Elmira Axundova ekoloji durumun heç də ürəkaçan olmadığını dilə gətirib: "Paytaxtın hər bir sakini təsdiqləyə bilər ki, Bakı ekoloji cəhətdən yaşanmalı, çox da konfortlu məkan deyil. Yeni doğulan uşaqların demək olar ki, hamısının allergik xəstəliklərə düçar olması buna əyani sübutdur. İki il bundan əvvəl atmosferə buraxılan tullantıların həcmi 957 min ton təşkil etdirdi. Bunların da 742 milyon tonu nəqliyyat vasitələrinin payına düşür. Yəqin ki, indi bu rəqəm daha da artıb".
Deputat əlavə edib ki, köhnə avtomobillər ekologiyaya böyük ziyan vurur: "Fikir verin, keçən il ölkəyə idxal olunmuş avtomobillərin 50 mini işlənmiş maşınlardır. Mənəvi cəhətdən köhnəlmiş nəqliyyat vasitələrinin istismarını qəti şəkildə qadağan etmək mümkün deyil. Çünki bununla bağlı hüquqi baza yoxdur. Bununla belə, problemin həlli yolunu tapmaq mümkündür. Bunun üçün avtomobilləri müsadirə etmək və "Avro-4" standartlarına uyğun avtomobillər alınması üçün vətəndaşlara güzəştli kreditlər vermək lazımdır. Bilirəm ki, bu maliyyə tələb edən problemdir. Amma bunu icra etməsək, "Avro-4"ə keçidi uğurla həyata keçirmək mümkün olmayacaq. Müsadirə olunan avtomobilə görə, kompensasiya ödənilməsi təcrübəsi artıq Rusiya mövcuddur. İkinci məsələ isə bu cür avtomobillər üçün poliqonların təşkil olunması və həmin avtomobillərin utilizasiyasıdır. Hər il orta hesabla 200-300 avtomobil utilizasiyaya göndəriləcək. Amma bu gün bir dənə də olsun poliqonumuz yoxdur. "Avro-4"ə keçidi elan etməklə məsələ həll olunmur. Odur ki, bunun üçün tədbirlər planı işlənib hazırlanmalıdır".