““Novorossiya” layihəsinin üstünə böyük məzar daşı qoyulub” Dünya

““Novorossiya” layihəsinin üstünə böyük məzar daşı qoyulub”

Pyotr Poroşenko: "İl ərzində ən böyük nailiyyətimiz Ukraynanı qoruyub saxlamaq olub"

Ukrayna prezidenti Pyotr Poroşenko bu vəzifəyə seçilməsinin 1-ci ildönümündə Ali Radada hesabat xarakterli çıxış edib. APA-nın "censor.net" saytına istinadən verdiyi məlumata görə, P. Poroşenko "Novorossiya" layihəsinin üzərinə böyük bir məzar daşı qoyulduğunu söyləyib. O, əmindir ki, Rusiya Ukrayna torpaqlarının bir hissəsinin ələ keçirilməsini nəzərdə tutan bu layihədən imtina edib.
P. Poroşenko bildirib ki, Ukrayna ordusunun "5-ci kolon" tərəfindən tam dağıdıldığını bilən Kreml bir il əvvəl Ukraynanı parçalamağa hazırlaşırdı: "Yanukoviçin vaxtında hər şey qonşu dövlətin ixtiyarına verilmişdi. Ordunun və xüsusi xidmət orqanlarının ləğvindən başqa, iş hətta o yerə çatmışdı ki, Ukrayna üçün qaz alınması ilə də Rusiya vətəndaşı məşğul olurdu".
Poroşenko Ukraynaya qarşı Rusiyanın nizamlı hərbi hissələrinin döyüşdüyünü və ölkənin şərq sərhədlərində qitənin ən güclü ordusunu dayandırmağa nail olduqlarını vurğulayıb. O, hazırda Donbassda 50 mindən çox Ukrayna əsgərinin döyüşdüyünü və Silahlı Qüvvələrinin ümumi sayının 250 minə çatdırıldığını açıqlayıb: "Lakin hələ də bir çox zəruri şey çatışmır, orduda başlayan islahatların yekunlaşmasına isə hələ çox qalıb. İl ərzində ən böyük nailiyyətimiz Ukraynanı qoruyub saxlamaq olub".
Dövlət başçısı hazırda Ukrayna ərazisində Rusiyanın ümumi sayı 9 min nəfərdən ibarət 14 taktiki qruplaşmasının olduğunu diqqətə çatdırıb: "Geniş miqyaslı hərbi əməliyyatların bərpası ehtimalı çox yüksəkdir".
İqtisadi vəziyyətə toxunan prezident Ukraynada defolt təhlükəsinin sovuşduğunu, makroiqtisadi sabitliyə nail olunduğunu qeyd edib: "Beynəlxalq Valyuta Fondu, ABŞ, Avropa İttifaqı və digər dövlətlərin iri miqyaslı makroiqtisadi yardımları, qeyri-populyar qərarlar və effektiv fəaliyyət qaçılmaz görünən defoltdan qaçmağa, makroiqtisadi durumu sabitləşdirməyə, əmək haqlarını və təqaüdləri gecikdirmədən ödəməyə, iqtisadiyyatın azalma tempini yavaşlatmağa, valyuta bazarındakı panikaya son qoymağa əsas verdi".
P. Poroşenko hesab edir ki, 2016-cı il müharibədən sonrakı bərpa ili olmalıdır. O, Rusiyadan iqtisadi asılılığı ciddi şəkildə azaldıqlarını da deyib və 2015-ci ilin ilk kvartalında təbii qaz idxalatında Rusiyanın payının 37 faizə düşdüyünü söyləyib.
Lakin bütün sadalananlara baxmayaraq, P. Poroşenko özünün, Ali Radanın və hökumətin işindən razı olmadığını nəzərə çatdırıb: "Mətbuatdakı tənqidlərdən şikayətlənmək mənim üçün ayıb olardı. Lakin heç kim məni mənim özüm qədər tənqid edə bilməz".