Yay tətili mövsümünün başlaması ilə əlaqədar Bakıətrafı kəndlərdə, dənizə yaxın ərazilərdə bağ evlərinə tələbat artır.

Bunu Trend-ə əmlak məsələləri üzrə ekspert Elnur Azadov deyib.

Onun sözlərinə görə, hazırda dənizkənarı yerlərdə ən bahalı torpaq və kirayəlik evlər Mərdəkan, Şüvəlan, Buzovna, Bilgəh və Novxanıdadır.

"Ən çox üstünlük verilən bağ evləri həyətində hovuzu olanlardır. Belə evlərin ikiaylıq kirayəsi təmirindən, otaq sayından aslı olaraq yay mövsümündə azı 3 500 manatdan yuxarı olur. Həyətində hovuzu olan evin qiyməti həmişə bahadır", - o bildirib.

Elnur Azadov qeyd edib ki, ötən il Abşeron çimərliklərinin yaxınlığındakı bağlara tələb dəfələrlə çoxalmışdı. Belə ki, gücləndirilən karantin məhdudiyyətləri insanları şəhər mənzillərindən kınay yerlərə getməyə məcbur edirdi.

"Çimərlik istirahətinə və bağ evlərinin kirayələrinə olan marağın kəskin şəkildə artması orada daşınmaz əmlak tikintisində də sürətli artıma səbəb oldu. Bu bazarın mütəxəssislərinin dediklərinə görə, yuxarıda göstərilən meyillər fonunda tikinti üçün torpaq sahələrinə maraq artdı və sahil zonasındakı evlər çoxaldı. Bu kimi reallıqlara təklifin artması səbəb olmuşdu, lakin cari mövsümdə vəziyyət ötənilki kimi deyil", - deyə ekspert bildirib.