“Qadın sağlamlığı: Reablitasiya” adlı konfrans keçirilib Hadisə

“Qadın sağlamlığı: Reablitasiya” adlı konfrans keçirilib

Dünən Jurnalist Qadınlar Assosiasiyası və "Xətai" klinikasının birgə layihəsi çərçivəsində "Qadın sağlamlığı: Reablitasiya" adlı konfrans keçirilib. SİA-nın xəbərinə görə, konfransda ilk olaraq çıxış edən Assosiasiyanın prezidenti Sevil Yusifova Türkiyədən dəvət olunan həkimlər Mətin Yurdakoş və Serbülent Orhanerə təşkilatçılar adından təşəkkür edib.
O bildirib ki, bu cür tədbirlər Azərbaycan və Türkiyə qardaşlığının inkişafına xüsusi töhfə verən layihələrdir: "Azərbaycan türklərinin çox sevdiyi bir misal var: "Sağlam bədəndə sağlam ruh olar". Bu gün qardaş ölkədən bizim sağlamlığımızı düşünüb gələn həkimlərin məqsədi insanların sağlam ruha mənsub olması üçün səhhətlərinin yaxşılaşdırılmasına xidmət edir. Aprelin 1-i və 2-si üçün nəzərdə tutulan 2 günlük müalicə dövründə həkimlərin sayəsində jurnalistlər üçün pulsuz müayinə aparacaqlar".
Sevil Yusifova həmçinin Azərbaycanda tibbin inkişafı və bu sahədə görülən işlərin təqdirə layiq olmasından söz açıb.
Tədbirdə çıxış edən həkim, müalicə və reabilitasiya mütəxəssisi Mətin Yurdakoş felç, bel fıtığı (qrija), revmatoid artrid, ayaq, diz, bel, boyun kirəcləşməsi, eləcə də onurğanın digər problemlərinin müalicə olunması haqqında ətraflı danışıb.
Ginekoloq Serbülent Orhaner isə ginekoloji problemlər, sonsuzluq və süni mayalanma və qadınlarda xərçəng xəstəliyinin müalicəsi haqda məlumat verərək tədbir iştirakçılarının bu sahədə sualları cavablandırıb.
Qeyd edək ki, səfər çərçivəsində həkimlər həm də fiziki qüsurlu uşaqların yaşadığı internat evlərinə baş çəkməyi nəzərdə tutur.