Aydın Mirzəzadə: "Azərbaycana investisiya qoymaq istəyən şirkətlərin sayı çoxalır, ölkəmizə gələn turistlərin sayı durmadan artır"

"Bakıda keçirilən Qlobal Gənc Liderlər Forumu yaxşı mənada iddialı layihədir. Hər bir ölkə Qlobal Liderlərin Forumunu keçirmək, bu məsələlərin müzakirə platformasına çevrilmək istəyər. Azərbaycan isə bu forumu keçirməklə buna hazır olduğunu və bu gün Bakının dünyada diplomatik mərkəzlərdən birinə çevrildiyini sübut edir". Bunu millət vəkili Aydın Mirzəzadə deyib.
Azərbaycanda vaxtaşırı beynəlxalq miqyaslı tədbirlərin keçirildiyini deyən deputat söyləyib ki, bu tədbirlər nəticəsində dünyanın bir çox tanınan liderləri, ictimai xadimləri ölkəmizə səfər edirlər: "Səfər zamanı təkcə gündəlikdəki məsələlər müzakirə edilmir, eyni zamanda Azərbaycanın inkişafı ilə də tanış edilir. Bununla da Azərbaycanın inkişaf modeli digər ölkələr üçün bir nümunəyə çevrilir".
Aydın Mirzəzadə bildirib ki, ölkəmizdə keçirilən beynəlxalq tədbirlərin nəticəsidir ki, Azərbaycana investisiya qoymaq istəyən şirkətlərin sayı çoxalır, ölkəmizə gələn turistlərin sayı durmadan artır: "Artıq Bakı çoxdilli, çoxmədəniyyətli bir şəhərə çevrilib. Azərbaycanın həm paytaxtı, həm də regionlarında mənzil almaq, burada iş qurmaq istəyənlərin sayıl da durmadan artır. Bundan əlavə, universitetlərimizdə də xarici tələbələrin sayının kəskin şəkildə artması gözlənilir. Bu günlərdə bildirildi ki, Azərbaycan təhsilinin flaqmanı olan Bakı Dövlət Universiteti üçün 7 min nəfərlik tələbə şəhərciyi salınacaq. Bu isə Azərbaycan diplomu almaq istəyən xarici ölkə gənclərinin sayının durmadan artmasına səbəb olacaq". "Azərbaycanda gənc lider yetişdirilməsi üçün artıq çox səmərəli bir model formalaşıb. Gənclərin yüksək səviyyəli təhsil alması, onların gənclər, ictimai təşkilatları vasitəsilə, həmçinin ayrı-ayrı keçirilən beynəlxalq tədbirlərdə könüllü funksiyası yerinə yetirməklə özlərini gələcək həyata hazırlaması buna çox yaxşı sübutdur. Azərbaycan gəncləri arzularını ölkəmizdə həyata keçirmək üçün ildən-ilə daha çox imkanlar qazanır. Eyn zamanda Azərbaycan gəncləri xarici ölkələrdə də ayrı-ayrı sahələrdə çox uğurlu mövqe tuta bilirlər. Bu gün Azərbaycan diplomu, Azərbaycan gəncliyi günü-gündən daha çox nüfuz qazanır", - deyə deputat qeyd edib. Aydın Mirzəzadə əlavə edib ki, Bakıda Qlobal Gənc Liderlər Forumunun keçirilməsi eyni zamanda dünyanın Azərbaycan həqiqətlərinin, tarixinin daha yaxından müşahidə edilməsinə şərait yaradacaq.