Cəfər Cabbarlı adına Respublika Gənclər Kitabxanasında Kəngərli rayonunun yaradılmasının 20 illiyi ilə əlaqədar “20 illik tarix, minillik inkişaf” adlı virtual sərgi təqdim edilib.

Kitabxanadan AZƏRTAC-a bildirilib ki, video formatında təqdim edilən sərgidə 2004-cü il martın 19-da Prezident İlham Əliyevin Naxçıvan Muxtar Respublikasında Kəngərli rayonunun yaradılması haqqında Azərbaycan Respublikasının Qanunu, Ulu Öndər Heydər Əliyevin müdrik fikirləri, qısa zaman kəsiyində sürətli və dinamik inkişaf yolu keçən rayon haqqında məlumatlar təqdim edilib.

Kitabxana əməkdaşları tərəfindən hazırlanan görüntülərdə qədim türk tayfaları olan kəngərlilər, bu bölgənin maddi-mədəniyyət nümunələri, əvəzsiz tarixi-memarlıq abidələri, adını tarixə qızıl hərflərlə yazmış elm, mədəniyyət, hərb xadimləri haqqında geniş məlumat verilib.

“20 illik tarix, minillik inkişaf” adlı virtual sərgi ilə kitabxananın rəsmi saytından https://ryl.az/multimedia/20-illik-tarix-minillik-inkisaf tanış olmaq olar.