“Türk Dövlətləri Təşkilatı fəaliyyət göstərdiyi dövrdə ölkələr arasında inteqrasiya proseslərinin və əlaqələrin gücləndirilməsinə mühüm töhfə verib. Təşkilata daxil olan ölkələr arasında münasibətlər artıq bir çox istiqamətlərdə inkişaf etməkdədir. Bu münasibətlər dövlət, cəmiyyət həyatının bütün sahələrini əhatə etməkdədir”.

Bunu Xalqcebhesi.az-a açıqlamasında politoloq Oqtay Qasımov deyib.

O.Qasımov TDT-nin 2040-cı il üçün planlarının müəyyənləşdiyini bildirərək əlavə edib ki, bütün bunlar hamısı optimist bir gələcəkdən xəbər verir: “Amma bununla yanaşı, hesab edirəm ki, TDT bu əlaqələri qurarkən özlərinin potensialından hələki tam istifadə etməyib. Bu potensial kifayət qədər böyükdür. Bu ölkələrin iqtisadi potensialları gələcəkdə ticarət dövriyyəsini qat-qat artırmağa imkan verə bilər. TDT-nin ölkələri arasında hazırkı ticarət dövriyyəsi 15 milyard dollar təşkil edir. Bu da qeyd olunan potensial qarşısında çox kiçik rəqəm sayıla bilər. Nəzərə alsaq ki, Türkiyə özünün müasir sənayesi, xüsusilə müdafiə sənayesi sektoru və iqtisadiyyatın digər sahələrində aparıcı ölkələrdən biri sayılır, Böyük 20-nin sırasına daxil olan ölkədir və son illər xüsusilə hərbi sənaye sahəsində çox ciddi uğurlara imza atılıb. Bundan başqa Azərbaycan və Orta Asiya cümhuriyyətləri olduqca böyük insan potensialı, gənc və dinamik əhali tərkibinə, o cümlədən təhsili mənimsəmiş və elmi səviyyəsi kifayət qədər yüksək olan bir əhaliyə malikdir. Bu resurs həm də gələcəyə təminat deməkdir”.

Politoloqun sözlərinə görə, TDT-nin yerləşdiyi strateji coğrafiya baxımından imkanları kifayət qədər böyükdür: “Bu coğrafiyadakı yeraltı zənginliklər və gələcək iqtisadi planların gerçəkləşməsi qarşılıqlı olaraq ticarət dövriyyəsinin də genişlənməsinə gətirə bilər. Doğrudan da bu gün bu ölkələr arasındakı ticarət dövriyyəsi TDT-nin dövlətlərinin malik olduğu potensialı əks etdirmir. Ciddi şəkildə iqtisadi sahədə ticarət dövriyyəsinin dəfələrlə artırılmasına ehtiyac və potensial var”.

Röya İsrafilova