“Azərbaycan Lapşin ilə bağlı vəziyyətdə ideal siyasi işini göstərib“ Siyasət

“Azərbaycan Lapşin ilə bağlı vəziyyətdə ideal siyasi işini göstərib“

Rusiyalı politoloq Sergey Markov Azərbaycan prezidenti İlham Əliyevin bloqqer Aleksandr Lapşinin əfv edilməsi barədə sərəncamını şərh edib.
Sergey Markovun sözlərinə görə, Azərbaycan Lapşin ilə bağlı vəziyyətdə ideal siyasi işini nümayiş edib: "Burada vacib olan odur ki, Lapşin yaxşı adam olduğuna və Azərbaycanın ərazi bütövlüyünü etiraf etdiyinə görə yox, Azərbaycanın öz tərəfdaşlarına, dost ölkələrinə güzəştə getdiyinə görə bu addımı atıb. Azərbaycan Lapşin ilə bağlı vəziyyətdə parlaq, ideal siyasi işini göstərib".
Sergey Markov əlavə edib ki, Azərbaycan separatçı Dağlıq Qarabağ rejimi ilə əməkdaşlıq edənlərə dərs vermək qərarına gəlib. Azərbaycanın işğal olunmuş torpaqları ilə bağlı probleminə rişxənd edənlər anlamalıdır ki, bu onlara çox baha başa gələcək: "Azərbaycan iqtidarı dəqiq, gözəl iş gördü və bütün məqsədlərə eyni vaxtda nail oldu. Əvvəlcə Azərbaycan həmin ərazilərə səfər etməyi planlaşdıranlara qarşı sərtlik, daha sonra Lapşinin vətəndaşı olduğu ölkələrə qarşı hörmətini, son nəticədə isə humanizm göstərdi".