İtaliyanın cənubunda yerləşən aktiv vulkanlardan biri olan Etna, bu səhər saatlarında cənub-şərq kraterində baş verən çökmə nəticəsində güclü və intensiv şəkildə kül və lava püskürtdü.

Xalqcebhesi.az xəbər verir ki, İtaliya Milli Geofizika və Vulkanologiya İnstitutunun (INGV) Kataniya şöbəsi – Etna Müşahidə Mərkəzinin məlumatına görə, 2 900 metr yüksəklikdə yerləşən cənub-şərq kraterinin bir hissəsinin çökməsi nəticəsində vulkanik partlayış baş verib.

Partlayışla birlikdə kraterdən sıx şəkildə kül çıxmış və bol miqdarda lava axını müşahidə olunmuşdur. İlkin müşahidələrə əsasən, kül buludunun 5 kilometr yüksəkliyə qədər çatdığı qeyd olunub.

Kraterdən püskürən lavanın Etna dağının yamacında yerləşən Aslan Vadisinin sərhədinə qədər irəlilədiyi bildirilib. Vulkan ətrafında dünən gecədən etibarən davam edən seysmik titrəyişlərin bu partlayışla əlaqəli olduğu qeyd edilib.

Həmçinin, vulkanik partlayış səbəbilə bölgədən keçən təyyarələr üçün “qırmızı kod” (ən yüksək təhlükə) xəbərdarlığı verilib.

Siciliya adasında yerləşən Etna vulkanı, təxminən 3 300 metr hündürlüyü ilə Avropa qitəsinin ən hündür aktiv vulkanı hesab olunur. Etnada bu il fevral, aprel və may aylarında da güclü vulkanik fəallıqlar qeydə alınmışdı.

Məryəm Quliyeva