İsrail Müdafiə Qüvvələri (IDF) Qəzza zolağının qərbində yerləşən "Netzarim" dəhlizinə nəzarəti ələ keçirərək, zolağı şimal və cənub hissələrə bölüb.

Xalqcebhesi.az xəbər verir ki, bu barədə İsrailin müdafiə naziri İsrael Kats bildirib.

"İDF, Qəzzanın sahilinin qərbində yerləşən 'Netsarim' dəhlizini ələ keçirərək, Qəzzanı şimal və cənuba bölüb. Bu, Qəzza şəhərinin mühasirəsini gücləndirəcək və şəhəri tərk etmək istəyən hər kəs cənuba doğru, İDF yoxlama məntəqələrindən keçmək məcburiyyətində qalacaq", - Kats "X" sosial şəbəkəsində yazıb. Onun sözlərinə görə, Qəzzanın sakinlərinə "son şans" verilir ki, cənuba köçsünlər və HƏMAS döyüşçülərini Qəzza şəhərində təcrid etsinlər. "Qəzza şəhərində qalanlar terrorçu və ya terrorizmi dəstəkləyənlər hesab ediləcək", - o əlavə edib.

Kats vurğulayıb ki, "İDF istənilən ehtimala hazırdır" və "bütün girovlar qaytarılana və HƏMAS tərksilah edilənə qədər əməliyyatı davam etdirmək əzmindədir". Bu, Qəzza zolağında "müharibənin sona çatmasına töhfə verəcək", o, yekunlaşdırıb.

Məryəm Quliyeva