Rusiya Federasiyası İranın Buşehr Atom Elektrik Stansiyasından (AES) daha 175 vətəndaşını Ermənistan vasitəsilə təxliyə edib.

“Armenpress”in xəbərinə görə, bu barədə Rusiyanın Ermənistandakı səfirliyi məlumat yayıb.

“Aprelin 6-da Buşehr Atom Elektrik Stansiyasından təxliyə edilən və Nurduz-Aqarak keçid məntəqəsi vasitəsilə İrandan Ermənistana gələn daha 175 Rusiya vətəndaşı xüsusi reyslə İrəvandan Moskvaya yola düşüb”, - açıqlamada bildirilir.

Səfirlik Ermənistan hakimiyyətinə prosesi dəstəklədiyinə görə təşəkkür edib.

Səfirliyin məlumatında o da qeyd edilib ki, İranda müharibənin başlamasından bəri Ermənistan ərazisi vasitəsilə 509 vətəndaş Rusiyaya qayıdıb.