ABŞ son aylarda Qrenlandiyada üç yeni hərbi bazasının açılması məsələsini Danimarka ilə müzakirə edir.

Xalqcebhesi.az xəbər verir ki, bu barədə "BBC" danışıqlara yaxın olan məmurlara və diplomatlara istinadən məlumat yayıb. Yanvarın ortalarından bəri tərəflər ən azı beş dəfə görüşüblər.

Danışıqlarda ABŞ-ı Dövlət Departamentinin müşaviri Maykl Nidhem təmsil edir. Ağ Ev Danimarka ilə yüksək səviyyədə danışıqların getməsi faktını təsdiqləsə də, detalları açıqlamaqdan imtina edib; yalnız qeyd olunub ki, "proses düzgün istiqamətdə gedir" və administrasiya bu prosesə nikbinliklə baxır. Danimarka XİN də detalları açıqlamadan danışıqların getdiyini təsdiqləyib.

BBC-nin mənbələri bildiriblər ki, yeni bazaların adanın cənubunda yerləşdirilməsi planlaşdırılır. Onların vəzifəsinə Şimali Atlantikada Rusiya və Çin Hərbi Dəniz Qüvvələrinin potensial fəaliyyətini izləmək daxil olacaq. Mənbələr qeyd ediblər ki, tərəflər arasında hələlik yekun razılıq əldə olunmayıb və yaradılması nəzərdə tutulan bazaların sayı dəyişə bilər.

Məryəm Quliyeva