İtaliyanın şimalındakı Val-di-Suza dərəsində Turin—Lion yüksəksürətli magistralının tikintisinə qarşı çıxanlarla baş verən toqquşmalarda iyulun 25-də 60-dan çox İtaliya hüquq-mühafizə orqanı əməkdaşı xəsarət alıb.

Xalqcebhesi.az xəbər verir ki, bu barədə "Corriere della Sera" məlumat verir.

İnsidentlər KyoMonte kommunasındakı tikinti meydançasının yaxınlığında baş verib. "No TAV" hərəkatının bir neçə fəallar qrupu çəpərləri yararaq obyektə daxil olub. Polisin ünvanına daşlar, petardalar və yandırıcı qarışığı olan şüşə qablar atılıb.

Nəticədə hüquq-mühafizə qüvvələrinə məxsus dörd avtomobil yandırılıb. Nəşrin məlumatına görə, ən fəal qrupun tərkibinə üzlərini gizlədən 700-ə yaxın şəxs daxil olub. Polis su şırnaqları və gözyaşardıcı qazdan istifadə edib. Bussoleno və Borqone arasında qatarların, habelə A32 magistralı ilə avtomobillərin hərəkəti müvəqqəti dayandırılıb.

Müstəntiqlər dronların çəkdiyi kadrları araşdırırlar, tikinti meydançasına və texnikaya dəymiş ziyan dəqiqləşdirilir.

Məryəm Quliyeva