Zaur Əliyev: "Layihə həyata keçirilən ərazilərdə məliyyatların sayı 52 faizdən çox artıb"

Parlamentin dünən keçirilən plenar iclasında "Tibbi sığorta haqqında" qanuna dəyişiklik layihəsi müzakirə olunub. Qanuna dəyişiklik barədə Milli Məclisin Səhiyyə komitəsinin sədri Əhliman Əmiraslanov məlumat verib.
Qanuna 15-10-cu (İcbari tibbi sığorta üzrə sığorta haqları) maddəsi əlavə edilib. Layihədə qeyd olunub ki, xidmətlər zərfinin baza hissəsi üzrə - təqvim ili üçün adambaşına 29 manat ödənilir.
Xidmətlər zərfinin əlavə hissəsi üzrə: bu qanunun 15-2.3.1(Milli Məclis, müvafiq icra hakimiyyəti orqanının müəyyən etdiyi orqan tərəfindən təyin olunan şəxslər, həmçinin seçkili ödənişli vəzifədə işləyən şəxslər) və 15-2.3.2 (neft-qaz sahəsində fəaliyyət göstərən və dövlət sektoruna aid edilən sığortalılarda Əmək Məcəlləsinə uyğun olaraq bağlanmış və hüquqi qüvvəyə minmiş əmək müqaviləsinə əsasən işləyən şəxslər):
Sığortalı tərəfindən-hesablanmış əməyin ödənişi fondunun 2 faizi,
Sığortaolunan tərəfindən – işçinin əmək haqqının 2 faizi,
Bu qanunun 15-2.3.3 (Əmək Məcəlləsinə uyğun olaraq bağlanmış və hüquqi qüvvəyə minmiş əmək müqaviləsi və ya Mülki Məcəlləyə uyğun olaraq mülki-hüquqi müqavilə əsasənda işləmədiyi və sahibkarlıq fəaliyyəti ilə məşğul olmadığı hallarda) maddəsində qeyd olunan şəxslər üzrə təqvim ili üçün adambaşına 120 manat,
Azərbaycan ərazisində istehsal edilərək daxili istehlaka yönəldilən (topdan satılan) və ölkə ərazisinə idxal olunan avtomobil benzinin, dizel yanacağının və maye qazın hər litrinə görə 0,02 manat,
Energetik içkilərə (alkoqollu və alkoqolsuz) və elektron siqaret üçün mayeyə aksiz markasının verilməsinə görə - verilən hər bir aksiz markasına görə 0,1 manat,
Tütün məmulatlarına aksiz markasının verilməsinə görə - verilən hər bir aksiz markasına görə 0,05 manat,
Alkoqollu içkilərə aksiz markasının verilməsinə görə - verilən hər bir aksiz markasına görə 0,1 manat,
Avtonəqliyyat vasitəsi sahiblərinin mülki məsuliyyətinin icbari sığortalı üzrə ödənilən təqvim haqqının 50 faizi,
"İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında" qanuna əsasən sığortalının sığorta müqaviləsi üzrə sığortaçıya ödədiyi sığorta haqqının 5 faizi.
İcbari Tibbi Sığorta üzrə Dövlət Agentliyinin direktoru Zaur Əliyev isə
İcbari tibbi sığorta ilə bağlı Azərbaycanın üç rayonunda həyata keçirilən pilot layihələrin nəticələri barədə məlumat verib. O, Milli Məclisdə çıxışı zamanı bildirib ki, artıq üç rayonda Mingəçevir, Yevlax və Ağdaş rayonlarında pilot layihələr həyata keçirilir. O qeyd edib ki, pilot layihələr nəticəsində əhalinin tibbi xidmətə əlçatanlığı yaxşılaşıb, xəstəxanaların maliyyə mexanizminə dəyişiklik edilib. O qeyd edib ki, pilot layihə həyata keçirilən ərazilərdə həkimlərin və tibb işçilərinin əmək haqlarına da dəyişiklik edildi və onların əmək haqlarında yüksəlişlər oldu. Direktorun sözlərinə görə, pilot layihələrdə elə həkimlər var ki, 5-6 mindən çox əməkhaqqı alırlar.
Direktor bildirib ki, pilot layihə həyata keçirilən ərazilərdə məliyyatların sayı 52 faizdən çox artıb, xəstəxanalarda çarpayılar kifayət qədər dolub, ölüm halları azalıb. Onun sözlərinə görə, ən çox həyata keçirilən əməliyyatlar ürək əməliyyatları olub.
Dəyişiklik səsverməyə çıxarılaraq qəbul edilib.