Uqanda hakimiyyəti cümə axşamı günü Eboladan müalicə olunan sonuncu xəstəni evə buraxmağı planlaşdırır. Bununla da ölkənin rəsmi olaraq virusdan azad elan edilməsi üçün zəruri olan 42 günlük müşahidə dövrü başlayacaq.

Xalqcebhesi.az xəbər verir ki, bu barədə "Reuters" məlumat yayıb.

Uqanda Səhiyyə Nazirliyinin məlumatına görə, cümə axşamı xəstəliyin qeydə alındığı 20 hadisədən 17-si sağalıb, iki nəfər vəfat edib, bir nəfər isə izolyatordadır və evə buraxılmalıdır. Yoluxma hallarının 5-i yerli, 15-i isə ölkə xaricindən gəlmə olub.

Hökumət nümayəndəsi Alan Kasudca bildirib ki, sonuncu xəstə evə buraxıldıqdan sonra yeni yoluxma halı olmadan 42 günlük geri sayım başlayacaq. Əgər bu müddət ərzində yeni yoluxma qeydə alınmazsa, Ümumdünya Səhiyyə Təşkilatı (ÜST) ölkədə Ebola alovlanmasının rəsmən başa çatdığını elan edə biləcək.

Aşkarlanan bütün hallar virusun nadir "Bundibuqio" ştamı ilə bağlıdır. ÜST-nin qiymətləndirməsinə görə, hazırkı alovlanma bu ştam üçün müşahidə tarixinin üçüncü ən böyük epidemiyası olub.

Eyni zamanda, ÜST-nin may ayında ictimai səhiyyə sahəsində fövqəladə vəziyyət elan etdiyi qonşu Konqo Demokratik Respublikasında son məlumatlara görə 2 011 təsdiqlənmiş yoluxma və 754 ölüm halı qeydə alınıb.

Məryəm Quliyeva